09/09/2026
တိုက်ခန်းပိုင်ဆိုင်မှုအတွက် အရေးပါတဲ့ "အိမ်လခပြေစာ"
~~~
Written by Lawyer Min Thein Aung
◼ ဥပဒေအရဆိုရင် မြေပိုင်ဆိုင်တဲ့သူဟာ အဲဒီမြေတင်မကဘဲ မြေပေါ်မှာ စွဲကပ်နေတဲ့ အရာအားလုံးကိုပါ ပိုင်ဆိုင်ပါတယ်။ ဥပမာ ၈ ထပ်တိုက်ကြီး ဆောက်ထားတယ်ဆိုရင် အဲဒီအဆောက်အအုံတစ်ခုလုံးကို မြေရှင်ကပဲ ပိုင်တာပါ။ ဒါဆို တိုက်ခန်းဝယ်တယ်ဆိုတာ ဘာလဲလို့ မေးစရာရှိလာပါတယ်။ တကယ်တော့ တိုက်ခန်းဝယ်တယ်ဆိုတာ အဆောက်အအုံကို ဝယ်လိုက်တာမဟုတ်ဘဲ အဲဒီတိုက်ခန်းမှာ “နေထိုင်ပိုင်ခွင့်” ကိုသာ တန်ရာတန်ကြေးပေးပြီး ဝယ်ယူလိုက်ကြတာ ဖြစ်ပါတယ်။ ဒါကြောင့် ကိုယ့်အခန်းမှာ အခန်းအသစ်ဖွဲ့တာပဲဖြစ်ဖြစ်၊ အကြီးစားပြင်ဆင်မှုတွေ လုပ်တာပဲဖြစ်ဖြစ် အဆောက်အအုံကိုပိုင်တဲ့ မြေပိုင်ရှင်ဆီကနေ ခွင့်ပြုချက် ကြိုတင်ရယူကြရတာပါ။
ဥပဒေရှုထောင့်ကနေ သေချာကြည့်ရင် တိုက်ခန်းဝယ်ယူသူဟာ အဆောက်အအုံ ဒါမှမဟုတ် မြေကို ပိုင်ဆိုင်သူ မဟုတ်ဘဲ “အိမ်ငှား” သာ ဖြစ်ပါတယ်။ မြေရှင်ကတော့ အဲဒီမြေနဲ့ အဆောက်အအုံရဲ့ အဓိကပိုင်ရှင်အဖြစ် ဆက်ရှိနေတုန်းပါပဲ။ ဒီတော့ သူတို့နှစ်ဦးကြားက အိမ်ရှင်-အိမ်ငှား ဆက်သွယ်မှု ခိုင်မာစေဖို့အတွက် တိုက်ခန်းဝယ်ယူနေထိုင်သူတွေဟာ မြေရှင်ကို အိမ်လခတွေ ပေးကြရတာ ဖြစ်ပါတယ်။ မြေရှင်အနေနဲ့လည်း အိမ်လခ လက်ခံရယူတာဟာ တိုက်ခန်းဝယ်ယူနေထိုင်သူရဲ့ ပိုင်ဆိုင်ခွင့် (နေထိုင်ခွင့်) ကို ခိုင်မာအောင် အသိအမှတ်ပြုပေးလိုက်တာပဲ ဖြစ်ပါတယ်။
ဒီလို အိမ်လခပေးတာဟာ နေထိုင်သူအတွက်လည်း အများကြီး အကျိုးရှိပါတယ်။ အိမ်လခပေးဆောင်ပြီး ပြေစာကို သေချာသိမ်းဆည်းရယူထားတာဟာ ကိုယ့်အတွက် ‘တရားဝင် အိမ်ငှားဖြစ်ပါတယ်’ ဆိုတဲ့ ခိုင်လုံတဲ့ သက်သေအထောက်အထားကို ရရှိစေပါတယ်။
မြန်မာနိုင်ငံရဲ့ တည်ဆဲဥပဒေတွေအရဆိုရင် အိမ်လခကို ပုံမှန်ပေးဆောင်နေတဲ့ တရားဝင် အိမ်ငှားတစ်ဦးကို မြေရှင်က အကြောင်းမဲ့သက်သက် အလွယ်တကူ နှင်ချဖယ်ရှားလို့ မရပါဘူး။ ဒါကြောင့် အိမ်လခ ပေးဆောင်နေခြင်းဟာ အပျောက်စနစ်နဲ့ တိုက်ခန်းဝယ်ယူထားသူအတွက် မိမိရဲ့ ရေရှည်နေထိုင်ခွင့်ကို ဥပဒေအရ အကာအကွယ် ရယူထားခြင်း တစ်မျိုးပဲ ဖြစ်ပါတယ်။ တနည်းအားဖြင့် ပြောရရင် တိုက်ခန်းဝယ်ယူသူတစ်ဦးအနေနဲ့ မြေရှင်ရဲ့ အသိအမှတ်ပြုမှုကို ရယူထားတာဟာ ဥပဒေရဲ့ အကာအကွယ်ကို ရယူလိုက်တာပါပဲ။
နောက်တစ်ချက်ကတော့ မြေနဲ့ အဆောက်အအုံ ပိုင်ရှင်အနေနဲ့ သူ့ရဲ့ပိုင်ဆိုင်မှုကို စီမံခန့်ခွဲတာဟာ သူ့ရဲ့ အခွင့်အရေး ဖြစ်ပါတယ်။ ဒါကြောင့် တိုက်ခန်းအရောင်းအဝယ်တွေမှာ ဝယ်ယူသူကို အသိအမှတ်ပြုပေးဖို့အတွက် အသိအမှတ်ပြုလက်မှတ်ထိုးခ (အမည်ပြောင်းခ) ယူတာမျိုးဟာ သူတို့ရဲ့ အခွင့်အရေးတစ်ခုလို ဖြစ်နေတာပါ။ ဒါပေမယ့် ဥပဒေမှာတော့ အိမ်ငှားအဖြစ် အသိအမှတ်ပြုပေးဖို့အတွက် မြေနဲ့အဆောက်အအုံပိုင်ရှင်ကို ငွေဘယ်လောက်ပေးရမယ်ဆိုတဲ့ တိကျတဲ့ သတ်မှတ်ပြဋ္ဌာန်းချက်တော့ မရှိပါဘူး။ မြေရှင်သဘောတူရင် တစ်ပြားတစ်ချပ်မှ မယူဘဲ အသိအမှတ်ပြုပေးလို့လည်း ရပါတယ်။
(အောက်ကပုံကတော့ တိုက်ခန်းအပျောက်စနစ်နဲ့ ဝယ်ယူနေထိုင်သူတစ်ဦးက အိမ်လခတွေပေးသွင်းပြီးတဲ့အခါ အိမ်ရှင်/မြေရှင်ကနေ ထုတ်ပေးထားတဲ့ အိမ်လခပြေစာလေးပဲ ဖြစ်ပါတယ်။)
အားလုံးကို ကျေးဇူးတင်ပါတယ်။
_______________
#အိမ်ခြံမြေ #တိုက်ခန်းအရောင်းအဝယ် #တိုက်ခန်း #အိမ်ရှင်အိမ်ငှား
