https://www.facebook.com/863163716887566/

Magway Legal Service - U.S. Trained Lawyer, လမ်း ၂၀၊ ရန်ဝေးရပ်, Magway (2026)

Q: What is the address?

လမ်း ၂၀၊ ရန်ဝေးရပ်

08/12/2025

"ဖုန်းမှန်လေး သွားလဲတာ... ပြန်ရတော့ ပါဝါပါ ဖွင့်မရတော့ဘူး။ ဆိုင်ကို လျော်ခိုင်းလို့ ရမလား"

ဒါမျိုးက လူတိုင်းလိုလို ကြုံဖူး ပါတယ်။

🤦‍♂️ ဖုန်းမှန်ကွဲလို့ ဆိုင်သွားပို့လိုက်တယ်။ နောက်နေ့ပြန်ယူတော့ မှန်ကတော့ ကောင်းသွားပါရဲ့၊ ဒါပေမဲ့ ဖုန်းက ပါဝါဖွင့်မရတော့ဘူး။ (ဒါမှမဟုတ်) ကားသွားပြင်တာ ဆိုင်ကြောင့် အောက်ပိုင်းပါ ထိလာတယ်။
ဆိုင်ရှင်ကတော့ - "ကျွန်တော်တို့က မှန်ပဲလဲတာလေ၊ စက်ပိုင်းဆိုင်ရာ ဖြစ်သွားတာ တာဝန်မယူနိုင်ဘူး" ဆိုပြီး ငြင်းမယ်။ ဆိုင်နံရံက "တာဝန်မယူပါ" ဆိုတဲ့ စာကို လက်ညှိုးထိုးပြမယ်။

ဒီလိုအခြေအနေမှာ ဘာမှမပြောနိုင်ဘဲ အိမ်ပြန်လာတာမျိုးမလုပ်ပါနဲ့။ 🙅‍♂️

စားသုံးသူကာကွယ်ရေးဥပဒေ ပုဒ်မ ၂၆ မှာ ဝန်ဆောင်မှုပေးသူတွေ လိုက်နာရမယ့် တာဝန်ကို အတိအကျ ပြဌာန်းထားပါတယ်။

၁။ မိမိဝန်ဆောင်မှုရဲ့ အရည်အသွေးနဲ့ ပတ်သက်ပြီး အာမခံချက် ရှိရမယ်။
၂။ မိမိဝန်ဆောင်မှုကြောင့် စားသုံးသူရဲ့ ပစ္စည်း ပျက်စီးဆုံးရှုံးမှု မဖြစ်စေရဘူး။

ဆိုလိုရင်းက - ဆိုင်ရဲ့ ပေါ့ဆမှုကြောင့်၊ ကျွမ်းကျင်မှုမရှိလို့ ကောင်းနေတဲ့နေရာပါ ထပ်ပျက်သွားရင် ဆိုင်မှာ ၁၀၀% တာဝန်ရှိပါတယ်။ ဆိုင်မှာ "တာဝန်မယူပါ" လို့ စာကပ်ထားရုံနဲ့ ဥပဒေရဲ့ အရေးယူမှုကနေ ရှောင်ပြေးလို့ မရပါဘူး။

စားသုံးသူတို့ရဲ့ အခွင့်အရေး ✅
- ပျက်စီးသွားတဲ့ အပိုင်းကို ဆိုင်စရိတ်နဲ့ အကောင်းအတိုင်း ပြန်ပြင်ပေးရမယ်။
- ပြင်မရတော့ရင် ကာလတန်ဖိုးနဲ့ညီတဲ့ လျော်ကြေး ပေးရမယ်။

ဒါကြောင့် ကိုယ့်ပစ္စည်းကို ဆိုင်က ဖျက်ဆီးလိုက်ရင် အားနာမနေပါနဲ့။ ရဲရဲတင်းတင်း တောင်းဆိုပါ။ မရရင် 1535 ကို ဆက်ပြီး တိုင်လို့ရပါတယ်။

07/12/2025

"၇ ရက်အတွင်း အသားဖြူစေရမယ်" လို့ ပိုပိုသာသာ ကြော်ငြာလိုက်တာကြောင့် ထောင်ကျနိုင်ပါတယ်။

Online Shop ခေတ်မှာ ပစ္စည်းရောင်းရဖို့အတွက် Caption ရေးတဲ့အခါ "ထိမိနေဖို့" လိုတယ်ဆိုတာ မှန်ပါတယ်။ ဒါပေမဲ့ အာမခံချက်လွန်ကဲခြင်း နဲ့ Marketing ကို မခွဲခြားတတ်ရင်တော့ ကိုယ့်လုပ်ငန်း အန္တရာယ်ရှိပါတယ်။

အထူးသဖြင့် - ❌ "တစ်ပတ်အတွင်း သိသိသာသာ ပိန်စေရမယ်" ❌ "တစ်ဘူးကုန်တာနဲ့ လုံးဝ အမွေးမပေါက်တော့ပါ" ❌ "သုံးရက်အတွင်း မျက်နှာက တင်းတိပ်တွေ အကုန်ပျောက်" ဆိုတဲ့ စာသားတွေဟာ လူစိတ်ဝင်စားမှုများသလို၊ ဥပဒေနဲ့ငြိဖို့ အလွယ်ဆုံး စာသားတွေ ဖြစ်ပါတယ်။

ဘာကြောင့်လဲဆိုတော့ စားသုံးသူကာကွယ်ရေးဥပဒေ ပုဒ်မ ၆၃ မှာ - စီးပွားရေးလုပ်ငန်းရှင်တွေဟာ ကုန်စည်နဲ့ပတ်သက်ပြီး စားသုံးသူတွေ ထင်ယောင်ထင်မှားဖြစ်စေမယ့် "လိမ်လည်လှည့်ဖြား ကြော်ငြာခြင်း " ကို လုံးဝ မလုပ်ရဘူးလို့ တားမြစ်ထားပါတယ်။

တကယ်လို့ သင်ကြော်ငြာသလို "၇ ရက်နဲ့ မပိန်ခဲ့ရင်"၊ "အမွေးပြန်ပေါက်ခဲ့ရင်" စားသုံးသူက တရားစွဲလို့ ရပါတယ်။ အဲဒီလို လိမ်ညာကြော်ငြာကြောင်း ပြစ်မှုထင်ရှားရင် ပုဒ်မ ၆၆ အရ - 👮‍♂️ ထောင်ဒဏ် (၂) နှစ်အထိ ဖြစ်စေ၊ 💰 ငွေဒဏ် ကျပ်သိန်း (၂၀၀) အထိ ဖြစ်စေ (သို့မဟုတ်) ဒဏ်နှစ်ရပ်လုံး ဖြစ်စေ ချမှတ်ခံရနိုင်ပါတယ်။

Marketing သမားများ သတိပြုရမှာက
- "ကူညီပေးနိုင်သည် (May help)"
- "သက်သာစေနိုင်သည် (Relieve)" ဆိုတဲ့ စကားလုံးတွေက ဥပဒေနဲ့ မငြိပေမယ့်...

- "လုံးဝ ပျောက်ကင်းစေရမည် (Cure/Guaranteed)"
-"အတည်ပြုပြီး (Verified)" (တကယ်မရှိဘဲ လျှောက်ပြောခြင်း) ဆိုတာမျိုးတွေကတော့ ရှောင်ကြဉ်သင့်ပါတယ်။

ရောင်းကောင်းချင်တာတော့ ဟုတ်ပါတယ်။ ဒါပေမဲ့ ဥပဒေဘောင်ထဲကပဲ "တာဝန်ယူမှုရှိရှိ" ရောင်းကြရအောင်နော်။

02/12/2025

"ဆံပင်ဆေးဆိုးတာ ဆံပင်တွေ ပြတ်ထွက်ကုန်ပြီ... ဆိုင်ကို လျော်ခိုင်းလို့ ရလား"

ပိုက်ဆံတွေ စုပြီး ဈေးကြီးတဲ့ ဆိုင်မှာ ဆံပင်သွားလုပ်တယ်။ ဒါပေမဲ့ ရလဒ်က မျှော်လင့်ထားသလို ဖြစ်မလာဘဲ ဆေးပြင်းသွားလို့ ဆံပင်တွေ ကျွတ်၊ အဖျားတွေ ရှူးပြီး ပြတ်ထွက်ကုန်တယ်။
ဆိုင်ရှင်က "ညီမ ဆံပင်သားက မကောင်းလို့ပါ" "Sorry ပါနော်" ဆိုပြီး တောင်းပန်စကားတစ်ခွန်းနဲ့ ပြီးစလွယ် လုပ်လို့ရလား။ အဖြေကတော့ "မရပါ” ဘူး။

ဘာ့ကြောင့်လဲဆိုရင် စားသုံးသူကာကွယ်ရေးဥပဒေ ပုဒ်မ ၂၆ အရ - ဝန်ဆောင်မှုပေးသူ တွေဟာ မိမိပေးလိုက်တဲ့ ဝန်ဆောင်မှုကြောင့် စားသုံးသူအပေါ် "ဘေးအန္တရာယ် မကျရောက်စေရ" ပါဘူး။ ဆံပင်ပြတ်ထွက်သွားတယ်ဆိုတာ သာမန်ကိစ္စ မဟုတ်ပါဘူး။ စားသုံးသူရဲ့ ခန္ဓာကိုယ်အစိတ်အပိုင်းကို ထိခိုက်ပျက်စီးစေတာ ဖြစ်ပါတယ်။

ဘာတွေ တောင်းဆိုခွင့်ရှိလဲ?
၁။ Refund: ဆံပင်လုပ်ခအဖြစ် ပေးထားတဲ့ငွေ အကုန်ပြန်တောင်းခွင့် ရှိတယ်။
၂။ Treatment Cost: ပျက်စီးသွားတဲ့ ဆံပင်ကို တခြားဆိုင်မှာ ပြန်ကောင်းအောင် ပြင်ရမယ့် ကုန်ကျစရိတ်ကို တောင်းခွင့်ရှိတယ်။
၃။ Compensation: စိတ်ဆင်းရဲရမှုနဲ့ အပြင်မထွက်ရဲတော့တဲ့ နစ်နာမှုတွေအတွက် လျော်ကြေး တောင်းခွင့်ရှိတယ်။

ဒါကြောင့်... ကိုယ့်ဆံပင် ပျက်စီးသွားရင် အိမ်ပြန်ရောက်မှ ငိုမနေပါနဲ့။ ဆိုင်ကို တရားဝင် Complaint တက်ပါ။ ဆိုင်က တာဝန်မယူရင် Consumer Call Center 1535 ကို ဖုန်းဆက်ပြီး တိုင်ကြားလိုက်ပါ။ 📞

30/11/2025

ဝယ်ပြီးပစ္စည်း ပြန်မလဲပါ" ဆိုင်းဘုတ်က တကယ်ရောအလုပ်ဖြစ်ရဲ့လား။

ဆိုင်တော်တော်များများရဲ့ ငွေရှင်းကောင်တာမှာ "ဝယ်ပြီးပစ္စည်း ပြန်မလဲပါ/ ပြန်မအမ်းပါ" ဆိုတဲ့ စာတန်းလေးတွေ ကပ်ထားတာကို မြင်ဖူးကြမှာပါ။ ဒီစာတန်းမြင်တာနဲ့ ကိုယ်ဝယ်လိုက်တဲ့ ပစ္စည်းက ချို့ယွင်းနေရင်တောင် "ငါ့အမှားပဲလေ၊ သူတို့လဲမပေးလောက်ပါဘူး" ဆိုပြီး လက်လျှော့လိုက်ကြတဲ့သူတွေ ရှိပါတယ်။

ဒါပေမဲ့ ဥပဒေအရ ကြည့်မယ်ဆိုရင် အဲဒီဆိုင်းဘုတ်က အရာမရောက်ပါဘူး။

စားသုံးသူကာကွယ်ရေးဥပဒေ ပုဒ်မ ၂၁ အရ - စားသုံးသူတစ်ယောက်ဟာ မိမိဝယ်ယူလိုက်တဲ့ ကုန်စည်နဲ့ ပတ်သက်ပြီး - ၁။ သဘောတူထားတဲ့ အာမခံချက်နဲ့ မကိုက်ညီရင်၊ ၂။ အရည်အသွေး နိမ့်ကျနေရင်၊ ၃။ သုံးစွဲဖို့ အန္တရာယ်ရှိနေရင် (သို့) ချို့ယွင်းနေရင်၊ ပစ္စည်းလဲလှယ်ခွင့် (သို့မဟုတ်) ငွေပြန်အမ်းခွင့် တောင်းဆိုပိုင်ခွင့် အပြည့်အဝရှိပါတယ်။

🚨ဆိုင်က ကိုယ့်သဘောနဲ့ကိုယ် စည်းကမ်းထုတ်ပြီး ဆိုင်းဘုတ်တင်ထားတာ ဖြစ်ပါတယ်။ နိုင်ငံတော်က ပြဌာန်းထားတဲ့ ဥပဒေကို ဘယ်ဆိုင်စည်းကမ်းကမှ ကျော်လွန်တားဆီးလို့ မရပါဘူး။ ဒါကြောင့် ပစ္စည်းက တကယ်ပဲ ချို့ယွင်းနေတယ်ဆိုရင် ဆိုင်းဘုတ်မှာ ဘာရေးထားထား တာဝန်ယူဖြေရှင်းပေးရမှာက ဆိုင်ရှင်ရဲ့ တာဝန်ဖြစ်ပါတယ်။

📌 သတိပြုရမှာက "အိမ်ရောက်မှ အရောင်မကြိုက်လို့"၊ "စိတ်ပြောင်းသွားလို့" ဆိုတဲ့ အကြောင်းပြချက်မျိုးဆိုရင်တော့ ဆိုင်က တာဝန်ယူပေးဖို့ မလိုပါဘူး။ ဒါပေမဲ့ "ပစ္စည်းအနာအဆာပါလာရင်" တော့ လဲပေးကို လဲပေးရပါမယ်။

✅စားသုံးသူဥပဒေရဲ့ အကောင်းဆုံးအချက်က "တရားရုံး ချက်ချင်းသွားစရာ မလိုတာ" ပါပဲ။

ကိုယ့်မှာ နစ်နာမှုတစ်ခုခုရှိရင် စားသုံးသူရေးရာဦးစီးဌာန (DOCA) ကို တိုင်ကြားနိုင်ပါတယ်။ ၁။ သူတို့က ဆိုင်ရှင်နဲ့ ဝယ်သူကို ခေါ်တွေ့ပေးတယ်။ ၂။ ညှိနှိုင်းဖြေရှင်း (Mediation) ပေးတယ်။ ၃။ ဆိုင်ဘက်က လျော်ကြေးပေးဖို့ သဘောတူရင် အမှုက အဲဒီမှာတင် ပြီးသွားပါပြီ။ ရှေ့နေခ၊ ရုံးစရိတ် မကုန်ပါဘူး။

ဆက်သွယ်ရန် - Consumer Call Center 1535 ကို ရုံးချိန်အတွင်း ဖုန်းဆက်တိုင်ကြားနိုင်ပါတယ်။

28/11/2025

အဖြေကတော့... "ဟုတ်ပါတယ်"။

ဒါပေမဲ့ နည်းလမ်း လုံးဝမရှိတော့တာတော့ မဟုတ်ပါဘူး။ ဥပဒေမှာ ကာလစည်းကမ်းသတ် ဥပဒေ ဆိုတာ ရှိပါတယ်။ အထူးသဖြင့် ငွေချေးသက်သေခံလက်မှတ် နဲ့ ငွေချေးထားမယ်ဆိုရင်( ငွေချေးစာချုပ်ပုံစံအမျိုးမျိုးတော့ရှိသည်) စာချုပ်စလုပ်တဲ့နေ့က နေ (၃) နှစ် အတွင်း တရားစွဲဆိုရပါမယ်။

(၃) နှစ်ကျော်သွားတာနဲ့ အဲဒီငွေကို တရားရုံးကနေတဆင့် တရားစွဲဆိုတောင်းခံပိုင်ခွင့် ဆုံးရှုံးသွားပါပြီ။ ကိုယ့်ပိုက်ဆံ ကိုယ်ပြန်လိုချင်တာတောင် ဥပဒေအရ ကူညီပေးလို့ မရတော့ပါဘူး။

😰 "ဒါဆို ကျွန်တော့်ပိုက်ဆံတွေ ဆုံးပြီလား?"

မဆုံးရှုံးခင် ဒီအချက် (၂) ချက်နဲ့ ကိုက်ညီမှု ရှိ/မရှိ ပြန်စစ်ကြည့်ပါ -

၁။ အတိုးပေးထားခြင်း ရှိလား?

(၃) နှစ် မပြည့်ခင် စပ်ကြားမှာ သူက အတိုးငွေ (သို့) အရင်းတချို့ လာဆပ်ဖူးလား? လာဆပ်တဲ့ရက်မှာ စာအုပ်ထဲ မှတ်တမ်းရေးပြီး သူ့ကို လက်မှတ်ထိုးခိုင်းထားတယ်ဆိုရင် အဲဒီ "နောက်ဆုံးပေးတဲ့ရက်" ကနေ နောက်ထပ် (၃) နှစ် သက်တမ်း ထပ်တိုးပြီး ရေတွက်ပါတယ်။

၂။ ဝန်ခံချက် ပေးဖူးလား?

"(၃) နှစ် မပြည့်ခင်မှာပဲ "ကျွန်တော် ပိုက်ဆံပြန်ဆပ်ပါမယ်" ဆိုပြီး စာရွက်စာတမ်းပေါ်မှာ လက်မှတ်ရေးထိုး ဝန်ခံချက်ပေးဖူးရင်အဲဒီရက်ကစပြီး သက်တမ်းပြန်စပါတယ်။

⚠️ သတိပြုရန် - Chatbox / Message ကနေ ကတိပြုထားရင်ရော လို့ မေးစရာရှိပါတယ်။ Message တွေဟာ "သက်သေခံအထောက်အထား" အဖြစ် အသုံးဝင်ပေမဲ့၊ ကာလစည်းကမ်းသတ်ဥပဒေ အရ တရားဝင်သက်တမ်းတိုးဖို့ဆိုရင်တော့ ခိုင်လုံမှု အားနည်းပါတယ်။

ဒါကြောင့် (၃) နှစ် မပြည့်ခင်မှာ Message ပို့ပြီး ညှိနှိုင်းနေမယ့်အစား၊ စာရွက်စာတမ်းပေါ်မှာ လက်မှတ်ပြန်ထိုးခိုင်းထားတာကသာ အသေချာဆုံး နည်းလမ်း ဖြစ်ပါတယ်။"

💡 ဥပဒေအကြံပြုချက်

တကယ်လို့ မိတ်ဆွေရဲ့ အကြွေးဟာ (၃) နှစ် ကျော်နေပြီဆိုရင်တော့ တရားရုံးသွားလို့ မရတော့ပါဘူး။ ဒါပေမဲ့ ညှိနှိုင်းခြင်း နည်းလမ်းကို သုံးလို့ရပါသေးတယ်။

သက်တမ်းကုန်သွားတဲ့ အကြွေးကို ပြန်ရဖို့အတွက်...
သူ့ဘက်က နားလည်မှုနဲ့ ပြန်ဆပ်အောင် ပြောဆိုနည်း။
စာချုပ်အသစ် ပြန်လည်ချုပ်ဆိုနည်း။

⚠️ သတိပေးချက်

ကိုယ့်လက်ထဲက စာချုပ်ဟာ ပြဿနာဖြစ်နေတာ (၂) နှစ်ကျော်နေပြီဆိုရင် ပေါ့ပေါ့ဆဆ မနေပါနဲ့။ (၃) နှစ် ပြည့်ဖို့ ရက်ပိုင်းအလိုမှ ရှေ့နေဆီရောက်လာရင် မီချင်မှ မီတော့မှာပါ။

မိတ်ဆွေတို့ရဲ့ စာချုပ်စာတမ်းနဲ့ပတ်သတ်ပြီး တိုင်ပင်ချင်ရင်၊ ပြုလုပ်ပြီး စာချုပ်တွေကို Review လုပ်စေချင်ရင် Message မှ တစ်ဆင့် အခမဲ့ဆက်သွယ်‌ေမးမြန်းနိုင်ပါတယ်။

27/11/2025

"သူငယ်ချင်းမို့ ယုံပြီး စာချုပ်မချုပ်လိုက်မိဘူး... အခု ပိုက်ဆံပြန်မရတော့ဘူး" ဆိုပြီး စိတ်ပူနေပါသလား? 🤯

မိတ်ဆွေ... ဒီလိုဖြစ်နေတာ ခင်ဗျားတစ်ယောက်တည်း မဟုတ်ပါဘူး။ မြန်မာနိုင်ငံမှာ အများဆုံးဖြစ်လေ့ရှိတဲ့ ပြဿနာပါ။ "စာချုပ်မရှိရင် ပိုက်ဆံပြန်ရဖို့ လုံးဝမရှိတော့ဘူး" လို့ ထင်နေရင်တော့ အဲဒီအတွေးကို အခုပဲ ရပ်လိုက်ပါ။
ဥပဒေမှာကြောင်းအရ လမ်းမပိတ်‌ေသးပါဘူး။ စာချုပ်မရှိပေမယ့် ခင်ဗျားလက်ထဲမှာ ဒီအချက် (၃) ချက်ရှိနေရင် မျှော်လင့်ချက် ရှိပါသေးတယ်။ 👇

✅ ၁။ Chat Screenshots (စာပြန်ထားတာတွေ) Messenger, Viber, Telegram မှာ "အေးပါ... ငါပြန်ဆပ်ပါ့မယ်" ၊ "ခဏစောင့်ပါဦး" လို့ သူပြောထားတဲ့ စာတွေ ရှိလား? ဒါတွေက သူပိုက်ဆံယူထားကြောင်း ဝန်ခံတဲ့ သက်သေတွေပါပဲ။ (Delete မလုပ်မိပါစေနဲ့)။

✅ ၂။ ဖုန်းပြောထားတဲ့ အသံဖိုင် (Voice Records) ပိုက်ဆံကိစ္စ ပြောဆိုထားတဲ့ အသံဖိုင်တွေ ရှိလား? ဘယ်နေ့၊ ဘယ်အချိန်က ပြောတယ်ဆိုတာ တိကျရင် ဒါဟာ ခိုင်လုံတဲ့ အီလက်ထရောနစ် သက်သေ (Electronic Evidence) ဖြစ်လာနိုင်ပါတယ်။

✅ ၃။ ငွေလွှဲပြေစာများ (Transfer Slips) Kpay, Wave, ဘဏ်အကောင့်ကနေ လွှဲပေးထားတဲ့ Screenshot တွေ၊ Slip တွေက ငွေပေးချေမှုရဲ့ အခိုင်မာဆုံး သက်သေတွေပါ။

⛔ သတိပြုရန် ပိုက်ဆံမရလို့ ဒေါသထွက်ပြီး Facebook မှာ ဓာတ်ပုံတင်၊ နှာခေါင်းစည်းတပ်ပြီး Post တင်တာမျိုး လုံးဝ (လုံးဝ) မလုပ်ပါနဲ့။ အဲ့ဒါက ကိုယ့်ဘက်က အမှန်တရားဖြစ်နေပါလျက်နဲ့ "အသရေဖျက်မှု"၊ နဲ့ပြန်ပြီး အမှုပတ်သွားနိုင်ပါတယ်။

💡 စာချုပ်မရှိလို့ ရှေ့နေငှားရမှာ၊ တရားစွဲရမှာ ကြောက်နေပါသလား? အမှုမဖွင့်ခင် မိတ်ဆွေမှာရှိတဲ့ Screenshot တွေ၊ အသံဖိုင်တွေကို စနစ်တကျ စုစည်းပြီး ခိုင်မာတဲ့ သက်သေဖြစ်အောင် အရင်ပြင်ဆင်ဖို့ လိုပါတယ်။

23/11/2025

မြေဂရန်ကို အပေါင်ထားခံပြီး ပိုက်ဆံထုတ်ချေးတော့မယ်ဆိုရင် ဒီအချက်တွေသိထားပါ။

မိတ်ဆွေဟာ ငွေပိုငွေလျှံရှိလို့ပဲဖြစ်ဖြစ်၊ မိတ်ဆွေအပေါင်းအသင်းက အကူအညီတောင်းလို့ပဲဖြစ်ဖြစ် အိမ်၊ ခြံ၊ မြေ တစ်ခုခုကို အာမခံထားပြီး ငွေချေးတော့မယ်ဆိုရင် သတိထားရမယ့် အချက်တွေရှိပါတယ်။

များသောအားဖြင့် “မြေဂရန်မူရင်း ယူထားရင် ပြီးတာပဲ"၊ "အရောင်းအဝယ်စာချုပ် ချုပ်ထားရင် စိတ်ချရပြီ" လို့ ထင်တတ်ကြပါတယ်။ ဒါပေမယ့် လက်တွေ့ပြဿနာတက်ပြီး တရားရုံးရောက်တဲ့အခါ ဒီအချက်တွေက အကာအကွယ် မပေးနိုင်ဘဲ ငွေရော၊ ပစ္စည်းပါ ဆုံးရှုံးရတာတွေ ဒုနဲ့ဒေး ရှိနေပါတယ်။

ဒါကြောင့် အိမ်ခြံမြေ အပေါင်ထားခံပြီး ငွေထုတ်ချေးတော့မယ်ဆိုရင် မဖြစ်မနေ သိထားသင့်တဲ့ ဥပဒေအချက် (၄) ချက်ကို မျှဝေပေးလိုက်ပါတယ်။

၁။ ပိုင်ဆိုင်မှု စာရွက်စာတမ်းများကို သေချာစစ်ဆေးပါ

ငွေမချေးခင် အောက်ပါအချက်တွေကို သေချာစစ်ဆေးပါ-

မူရင်း ဟုတ်/မဟုတ်: ဂရန်စာချုပ်၊ အရောင်းအဝယ်စာချုပ်တွေက မိတ္တူလား၊ မူရင်းလား သေချာကြည့်ပါ။

ပိုင်ရှင်အစစ် ဟုတ်/မဟုတ်: လာပေါင်တဲ့သူက စာချုပ်ထဲက နာမည်ပေါက်ပိုင်ရှင် ဟုတ်ရဲ့လား။

ဝန်ကင်းရှင်းမှု: ဒီအိမ်ကို ဘဏ်မှာ ပေါင်ထားတာမျိုး၊ တခြားလူဆီမှာ ပေါင်ထားတာမျိုး ရှိ/မရှိ စုံစမ်းပါ။ (မှတ်ပုံတင်ရုံးမှာ စစ်ဆေးနိုင်ပါတယ်)။

၂။ "အရောင်ပြ" အရောင်းအဝယ်စာချုပ်များကို ရှောင်ကြဉ်ပါ။

လူအများစု မှားနေကြတဲ့ အကြီးမားဆုံး အမှားကတော့ "အပေါင်ခံတာကို အရောင်းအဝယ်စာချုပ် (အရပ်စာချုပ်) နဲ့ ချုပ်ဆိုခြင်း" ပါပဲ။ ငွေထုတ်ပေးပြီး ၆ လအတွင်း ပြန်မရွေးနိုင်ရင် အဆုံးအဖြစ် အရောင်းအဝယ်စာချုပ်ပုံစံမျိုးချုပ်ကြပါတယ်။ ပြဿနာတွေဖြစ်ကြလို့ တရားရုံးရောက်ရင် တကယ်တမ်း အရောင်းအဝယ်မဟုတ်ဘဲ ငွေချေးတာ ပေါ်ပေါက်ရင် "အိမ်ကိုဖယ်ပေးပါ" လို့ တောင်းဆိုလို့ မရသလို၊ ငွေပြန်လိုချင်ရင်လည်း စာချုပ်က လွဲနေတဲ့အတွက် အမှုက ရှုပ်ထွေးသွားတတ်ပါတယ်။

၃။ စာချုပ်စာတမ်း မှတ်ပုံတင်ရုံးတွင် "မှတ်ပုံတင်" ပါ။

အိမ်ခြံမြေဆိုတာ မရွေ့မပြောင်းနိုင်တဲ့ ပစ္စည်း (Immovable Property) ဖြစ်ပါတယ်။ တန်ဖိုး (၁) သိန်းကျပ်ထက် ကျော်လွန်တဲ့ အိမ်ခြံမြေ ပေါင်နှံမှုတိုင်းကို စာချုပ်စာတမ်း မှတ်ပုံတင်ရုံးမှာ "မှတ်ပုံတင်" (Registration) မလုပ်ရင် ဥပဒေအရ အတည်မဖြစ်ပါဘူး။ ရပ်ကွက်ရုံး၊ ရှေ့နေရုံးလောက်မှာ ချုပ်တဲ့ "ကတိစာချုပ်" သက်သက်နဲ့ အိမ်ကို ပိုင်ဆိုင်ကြောင်း၊ ပေါင်နှံထားကြောင်း သက်သေပြလို့ မရပါဘူး။ မှတ်ပုံတင်စာချုပ် (Registered Mortgage Deed) ရှိမှသာ ငွေမဆပ်ရင် အိမ်ကို တရားဝင် လေလံပစ် ရောင်းချခွင့် ရှိမှာ ဖြစ်ပါတယ်။

၄။ "လက်ရောက်" မရရင် အိမ်ကို သိမ်းလို့မရပါ။

ငွေချေးသူ အများစုက ၆ လ ပြည့်လို့ ငွေမဆပ်ရင် အိမ်ကို သိမ်းမည် ဆိုတဲ့ စာသားမျိုးကို စာချုပ်ထဲ ထည့်ချုပ်တတ်ကြပါတယ်။

ဥပဒေအရ "ရွေးနုတ်ပိုင်ခွင့်" (Right of Redemption) ဆိုတာ ရှိပါတယ်။ ပိုင်ရှင်က ငွေမဆပ်နိုင်ရုံနဲ့ အိမ်ကို အလိုအလျောက် အသိမ်းခံရမယ့်သဘော ဥပဒေအရ တရားမဝင်ပါဘူး။

အိမ်ရှင်က အိမ်ပေါ်မှာ လက်ရောက်နေထိုင်နေသမျှ ကာလပတ်လုံး၊ မိတ်ဆွေက စာချုပ်မူရင်းကို ဘယ်လောက်ပဲ ကိုင်ထားပါစေ၊ အိမ်ကို အတင်းအဓမ္မ မောင်းချခွင့်၊ သော့ခတ်ခွင့် မရှိပါဘူး။ (ပိုင်နက်ကျူးကျော်မှုတောင် ဖြစ်သွားနိုင်ပါတယ်)။

အကြံပြုချက်: ငွေချေးရင် "ငွေချေး/ပေါင်နှံစာချုပ်" အမှန်အတိုင်း ချုပ်တာက အကောင်းဆုံးပါ။

ပြဿနာ မတက်အောင် ဘယ်လိုစာချုပ် ချုပ်ရမလဲဆိုရင်-

"ငွေချေးသူ၊ ငွေချေးယူသူ နှစ်ဦးစလုံး စာချုပ်စာတမ်း မှတ်ပုံတင်ရုံးသို့ သွားရောက်ပြီး 'မှတ်ပုံတင် ရိုးရိုးပေါင်နှံစာချုပ်' (Registered Simple Mortgage Deed) ကို တရားဝင် ချုပ်ဆိုပါ။"

ဒါဟာ ကုန်ကျစရိတ် အနည်းငယ် ရှိပေမယ့်၊ ငွေဆုံးရှုံးနိုင်ခြေ နဲ့ အမှုအခင်း ရှုပ်ထွေးနိုင်ခြေကို ၁၀၀% နီးပါး ကာကွယ်ပေးနိုင်တဲ့ တစ်ခုတည်းသော နည်းလမ်း ဖြစ်ပါတယ်။

#ဥပဒေအကြံပေး #မြေဂရန် #အပေါင်ခံ

22/11/2025

ငွေချေးစာချုပ်မှာ ဒီအချက်တွေမပါရင် တရားစွဲဖို့ ခက်ခဲပါလိမ့်မယ်။

#ငွေချေးစာချုပ် #ဥပဒေအကြံပေး #မကွေးမြို့ #ဥပဒေအကြံပေး

Magway Legal Service - U.S. Trained Lawyer

08/12/2025

07/12/2025

02/12/2025

30/11/2025

28/11/2025

27/11/2025

23/11/2025

22/11/2025

Address

Website

Alerts

Shortcuts

Share

Category