14/09/2026
ਨਹਿਰ ਤੇ ਨਹਿਰੀ ਪਾਣੀ ਦੇ ਨਾਂ ’ਤੇ ਪੰਜਾਬ ਸਰਕਾਰ ਲੋਕਾਂ ਨੂੰ ਕਰ ਰਹੀ ਗੁੰਮਰਾਹ : ਗੌਰਵ ਰਾਣਾ
5 ਸਾਲਾਂ ’ਚ ਨਹਿਰੀ ਪਾਣੀ ਤਾਂ ਦੂਰ, 10 ਪਿੰਡਾਂ ਨੂੰ ਚੱਲਣ ਲਈ ਰਾਹ ਵੀ ਨਹੀਂ ਦੇ ਸਕੀ ਸਰਕਾਰ : ਪੰਜਾਬ ਮੋਰਚਾ
ਕਾਹਨਪੁਰ ਖੂਹੀ–ਖੇੜਾ ਕਲਮੋਟ ਸੜਕ ਦੀ ਖਸਤਾ ਹਾਲਤ ਤੋਂ ਭੜਕੇ ਲੋਕ, 10 ਦਿਨਾਂ ’ਚ ਕੰਕਰੀਟ ਸੜਕ ਦਾ ਕੰਮ ਸ਼ੁਰੂ ਨਾ ਹੋਇਆ ਤਾਂ ਕਰਾਂਗੇ ਸਖਤ ਐਕਸ਼ਨ।
ਕਾਹਨਪੁਰ ਖੂਹੀ/ਰੂਪਨਗਰ, 14 ਸਤੰਬਰ (ਵਿਸ਼ੇਸ਼ ਪ੍ਰਤੀਨਿਧੀ)। ਪਾਣੀਆਂ ਜੀ ਸਹੀ ਵੰਡ ਤੇ ਸ਼ੁੱਧ ਪਾਣੀ ਪਿੰਡਾਂ ਨੂੰ ਮੁਹਈਆ ਕਰਾਉਣ ਦੇ ਮੁੱਦੇ ਨੂੰ ਲੈ ਕੇ ਨਿਰੰਤਰ ਸੰਘਰਸ਼ ਕਰ ਰਹੇ ਪੰਜਾਬ ਮੋਰਚਾ ਦੇ ਕਨਵੀਨਰ ਕੁਮਾਰ ਗੌਰਵ ਰਾਣਾ ਅਤੇ ਰਾਣਾ ਕੁਲਦੀਪ ਸਿੰਘ ਰੈਸੜਾ ਦੀ ਅਗਵਾਈ ਹੇਠ ਅੱਜ ਪਿੰਡ ਸਪਾਲਵਾਂ ਵਿਖੇ ਨਹਿਰੀ ਪਾਣੀ ਅਤੇ ਨਹਿਰ ਦੀ ਪ੍ਰਾਪਤੀ ਸਬੰਧੀ ਹੰਗਾਮੀ ਮੀਟਿੰਗ ਹੋਈ। ਇਸ ਮੌਕੇ ਇਲਾਕੇ ਦੇ ਪੀੜਤ ਪਿੰਡਾਂ ਦੇ ਵੱਡੀ ਗਿਣਤੀ ਲੋਕਾਂ ਨੇ ਪੰਜਾਬ ਸਰਕਾਰ ਵਿਰੁੱਧ ਆਪਣਾ ਰੋਸ ਜ਼ਾਹਰ ਕੀਤਾ।
ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਗੌਰਵ ਰਾਣਾ ਨੇ ਕਿਹਾ ਕਿ ਪੰਜ ਸਾਲਾਂ ਵਿੱਚ ਲੋਕਾਂ ਨੂੰ ਨਹਿਰੀ ਪਾਣੀ ਦੀ ਸਹੂਲਤ ਦੇਣਾ ਤਾਂ ਦੂਰ ਦੀ ਗੱਲ ਹੈ, ਸਰਕਾਰ ਇਨ੍ਹਾਂ ਪਿੰਡਾਂ ਦੇ ਲੋਕਾਂ ਨੂੰ ਆਉਣ-ਜਾਣ ਲਈ ਢੰਗ ਦਾ ਰਾਹ ਤੱਕ ਨਹੀਂ ਦੇ ਸਕੀ। ਉਨ੍ਹਾਂ ਕਿਹਾ ਕਿ ਕਾਹਨਪੁਰ ਖੂਹੀ ਤੋਂ ਖੇੜਾ ਕਲਮੋਟ ਤੱਕ ਲਗਭਗ 10 ਕਿਲੋਮੀਟਰ ਸੜਕ ਦੀ ਮਾੜੀ ਹਾਲਤ ਨੇ ਕਰੀਬ 10 ਪਿੰਡਾਂ ਦੇ ਲੋਕਾਂ ਦੀ ਜ਼ਿੰਦਗੀ ਨਰਕ ਬਣਾ ਦਿੱਤੀ ਹੈ।
ਰਾਣਾ ਨੇ ਕਿਹਾ ਕਿ ਲੋਕ ਲੰਬੇ ਸਮੇਂ ਤੋਂ ਨਹਿਰ ਅਤੇ ਨਹਿਰੀ ਪਾਣੀ ਦੀ ਮੰਗ ਕਰ ਰਹੇ ਹਨ, ਪਰ ਸਰਕਾਰ ਵੱਲੋਂ ਕਦੇ ਟੋਭੇ, ਕਦੇ ਸਵਾਂ ਅਤੇ ਕਦੇ ਬਰਸਾਤੀ ਪਾਣੀ ਨੂੰ ਬੰਨ੍ਹ ਕੇ ਪਾਣੀ ਦੇਣ ਦੇ ਦਾਅਵੇ ਕੀਤੇ ਜਾਂਦੇ ਹਨ। ਉਨ੍ਹਾਂ ਸਵਾਲ ਕੀਤਾ ਕਿ ਜੇਕਰ ਲੋਕਾਂ ਦੀ ਮੰਗ ਨਹਿਰੀ ਪਾਣੀ ਦੀ ਹੈ ਤਾਂ ਸਰਕਾਰ ਨਹਿਰ ਦੀ ਬਜਾਏ ਹੋਰ ਸਰੋਤਾਂ ਦੇ ਨਾਂ ’ਤੇ ਉਨ੍ਹਾਂ ਨੂੰ ਕਿਉਂ ਗੁੰਮਰਾਹ ਕਰ ਰਹੀ ਹੈ?
ਉਨ੍ਹਾਂ ਕਿਹਾ ਕਿ ਇੱਕ ਪਾਸੇ ਸਰਕਾਰ ਦੇ ਵਿਧਾਇਕ ਸਤਲੁਜ ਅਤੇ ਸਵਾਂ ਦਰਿਆ ਵਿੱਚ ਗੰਦੇ ਪਾਣੀ ਅਤੇ ਰਸਾਇਣ ਮਿਲਣ ਦੇ ਦਾਅਵੇ ਕਰ ਰਹੇ ਹਨ, ਜਦਕਿ ਦੂਜੇ ਪਾਸੇ ਇਨ੍ਹਾਂ ਹੀ ਸਰੋਤਾਂ ਤੋਂ ਲੋਕਾਂ ਨੂੰ ਪਾਣੀ ਦੇਣ ਦੀਆਂ ਗੱਲਾਂ ਕੀਤੀਆਂ ਜਾ ਰਹੀਆਂ ਹਨ। ਰਾਣਾ ਨੇ ਕਿਹਾ ਕਿ ਜਿਹੜੇ ਦਾਅਵੇ ਕੀਤੇ ਗਏ ਸਨ, ਉਹ ਵੀ ਅਜੇ ਤੱਕ ਇਸ ਇਲਾਕੇ ਵਿੱਚ ਪੂਰੇ ਨਹੀਂ ਹੋਏ।
12 ਕਰੋੜ ਖਰਚਣ ਦੇ ਦਾਅਵੇ, ਜ਼ਮੀਨ ’ਤੇ ਨਜ਼ਰ ਆਏ ਸਿਰਫ਼ ਕੁਝ ਟੁਕੜੇ
ਇਲਾਕਾ ਵਾਸੀਆਂ ਨੇ ਕਿਹਾ ਕਿ ਕਾਹਨਪੁਰ ਖੂਹੀ ਤੋਂ ਖੇੜਾ ਕਲਮੋਟ ਤੱਕ ਕਰੀਬ 10 ਕਿਲੋਮੀਟਰ ਸੜਕ ਦੀ ਮੁਰੰਮਤ ਅਤੇ ਨਵੀਨੀਕਰਨ ਲਈ ਜੁਲਾਈ ਮਹੀਨੇ ਵਿੱਚ ਲਗਭਗ 12 ਕਰੋੜ ਰੁਪਏ ਖਰਚਣ ਦੇ ਵੱਡੇ ਦਾਅਵੇ ਕੀਤੇ ਗਏ ਸਨ, ਪਰ ਜ਼ਮੀਨੀ ਹਕੀਕਤ ਕੁਝ ਹੋਰ ਹੀ ਹੈ। ਇੱਥੇ ਸਿਰਫ ਕੁਝ ਕੁ ਟੋਟੇ ਕੰਕਰੀਟਂ ਦੇ ਬਣਾਏ ਗਏ ਹਨ ਬਾਕੀ ਸਾਰੀ ਲੋੜ ਪੱਖ ਤੋਂ ਪੱਤਰ ਹਾਲਤ ਵੱਡੇ ਵੱਡੇ ਖੱਡਿਆਂ ਵਿੱਚ ਤਬਦੀਲ ਹੋਈ ਪਈ ਹੈ। ਉਨ੍ਹਾਂ ਮੁਤਾਬਕ ਰੂਪਨਗਰ ਹਲਕੇ ਦੇ ਇਲਾਕੇ ਵਿੱਚ ਹੁਣ ਤੱਕ ਲਗਭਗ ਅੱਧਾ ਕਿਲੋਮੀਟਰ ਦੇ ਕਰੀਬ ਕੁਝ ਟੁਕੜਿਆਂ ਵਿੱਚ ਹੀ ਕੰਕਰੀਟ ਪਾਈ ਗਈ ਹੈ ਅਤੇ ਉਨ੍ਹਾਂ ਵਿੱਚੋਂ ਵੀ ਕੁਝ ਥਾਵਾਂ ’ਤੇ ਕੰਕਰੀਟ ਉਖੜਨੀ ਸ਼ੁਰੂ ਹੋ ਗਈ ਹੈ।
ਮੀਟਿੰਗ ਤੋਂ ਬਾਅਦ ਇਲਾਕਾ ਵਾਸੀਆਂ ਅਤੇ ਪੰਜਾਬ ਮੋਰਚਾ ਦੀ ਟੀਮ ਨੇ “ਪੰਜਾਬ ਸਰਕਾਰ ਮੁਰਦਾਬਾਦ” ਅਤੇ “ਰੂਪਨਗਰ ਹਲਕੇ ਦਾ ਨਕਲੀ ਵਿਕਾਸ ਮੁਰਦਾਬਾਦ” ਦੇ ਨਾਅਰੇ ਲਗਾਉਂਦਿਆਂ ਰੋਸ ਪ੍ਰਦਰਸ਼ਨ ਕੀਤਾ।
ਪੰਜਾਬ ਮੋਰਚਾ ਨੇ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਕਿ ਜੇਕਰ 10 ਦਿਨਾਂ ਦੇ ਅੰਦਰ ਇਸ ਸੜਕ ’ਤੇ ਲੜੀਵਾਰ ਕੰਕਰੀਟ ਸੜਕ ਬਣਾਉਣ ਦਾ ਕੰਮ ਸ਼ੁਰੂ ਨਾ ਕੀਤਾ ਗਿਆ ਤਾ ਸੰਘਰਸ਼ ਸ਼ੁਰੂ ਕੀਤਾ ਜਾਵੇਗਾ।
ਇਸ ਮੌਕੇ ਰਾਹਗੀਰ ਭਜਨ ਕੌਰ, ਸੁਤਲਾ ਦੇਵੀ ਅਤੇ ਹੋਰ ਪੀੜਤ ਇਲਾਕਾ ਵਾਸੀਆਂ ਨੇ ਕਿਹਾ ਕਿ ਆਉਣ-ਜਾਣ ਲਈ ਕੋਈ ਢੁੱਕਵੀਂ ਸਰਕਾਰੀ ਬੱਸ ਸਹੂਲਤ ਵੀ ਨਹੀਂ ਹੈ। ਖਸਤਾ ਹਾਲ ਸੜਕ ’ਤੇ ਵਾਹਨ ਚਲਾਉਣਾ ਵੀ ਖਤਰੇ ਤੋਂ ਖਾਲੀ ਨਹੀਂ। ਉਨ੍ਹਾਂ ਕਿਹਾ ਕਿ ਮੋਟਰਸਾਈਕਲਾਂ ਅਤੇ ਹੋਰ ਵਾਹਨਾਂ ਦੇ ਲੰਘਣ ਸਮੇਂ ਉੱਡਦੀ ਮਿੱਟੀ ਅਤੇ ਗੰਦੇ ਪਾਣੀ ਕਾਰਨ ਰੋਜ਼ਾਨਾ ਕੱਪੜੇ ਖਰਾਬ ਹੋ ਜਾਂਦੇ ਹਨ, ਪਰ ਸਰਕਾਰ ਲੋਕਾਂ ਦੀਆਂ ਮੁੱਢਲੀਆਂ ਸਹੂਲਤਾਂ ਦੀ ਬਜਾਏ ਭਾਰੀ ਵਾਹਨਾਂ ਦੀ ਆਵਾਜਾਈ ਨੂੰ ਸਹੂਲਤ ਦੇਣ ਵੱਲ ਵਧੇਰੇ ਧਿਆਨ ਦੇ ਰਹੀ ਹੈ। ਇਸ ਮੌਕੇ ਉਥੇ ਅਵਤਾਰ ਸਿੰਘ ਸਾਬਕਾ ਸਰਪੰਚ ਤਾਰੂ ਰਾਣਾ ਚੈਨ ਸਿੰਘ ਮੇਹਰ ਸਿੰਘ ਬੱਬੂ ਬਹਾਦਰ ਸਿੰਘ ਕੇਵਲ ਸਿੰਘ ਬਾਬਾ ਬਲਬੀਰ ਸਿੰਘ ਉਪਿੰਦਰ ਸਿੰਘ ਰਾਣਾ ਰਾਮ ਸਿੰਘ ਨਿਮਾ ਰਾਣਾ ਗਿਆਨੀ ਸਿੰਘ ਅਮਨਦੀਪ ਸਿੰਘ ਜਗਦੇਵ ਸਿੰਘ ਸਰਪੰਚ ਕਿਸ਼ੋਰ ਸਿੰਘ ਸੂਬੇਦਾਰ ਰੋਸ਼ਨ ਲਾਲ ਬਲਵੀਰ ਖਾਨ ਹਰਪ੍ਰੀਤ ਸਿੰਘ
ਤਸਵੀਰ-1 : ਪਿੰਡ ਸਪਾਲਵਾਂ ਵਿਖੇ ਨਹਿਰੀ ਪਾਣੀ ਦੇ ਮੁੱਦੇ ’ਤੇ ਹੋਈ ਮੀਟਿੰਗ ਦੌਰਾਨ ਪੰਜਾਬ ਮੋਰਚਾ ਕਨਵੀਨਰ ਗੌਰਵ ਰਾਣਾ, ਰਾਣਾ ਕੁਲਦੀਪ ਸਿੰਘ,ਮੇਹਰ ਸਿੰਘ ਬੱਬੂ, ਸਾਬਕਾ ਸਰਪੰਚ ਅਵਤਾਰ ਸਿੰਘ ਤਾਰੂ ਅਤੇ ਹੋਰ ਆਗੂ।
ਤਸਵੀਰ-2 : ਖਸਤਾ ਹਾਲ ਸੜਕ ਅਤੇ ਮਾੜੀਆਂ ਸਹੂਲਤਾਂ ਤੋਂ ਪੀੜਤ ਇਲਾਕਾ ਵਾਸੀ ਪੰਜਾਬ ਸਰਕਾਰ ਵਿਰੁੱਧ ਨਾਅਰੇਬਾਜ਼ੀ ਕਰਦੇ ਹੋਏ।ml
