MIZO POEtry

MIZO POEtry MIZO POETRY

Fate lawmman dawng. Lalpa a ropui e.
28/12/2025

Fate lawmman dawng. Lalpa a ropui e.

08/11/2024

*"SAM ANG KA ṬHEN LO'NG CHE LALNUNNEM"*
_Valsêna Chhangte_

Chung kâwl êng riai vangpui lallai chuaiin,
S*k kâwl êng mâwi alo her leh dawn ta.
Zalêng hlim zâi vawra tual chai ka thlir a,
Zun leng a zâm thinlai lo hnîm e.
Damthli vâwt leng karah biahnêm min hlan,
"Sam ang ka ṭhen lo'ng che lalnunnem."
Zan tiang thim lo zan par rimtui lêng vel karah khan e,
Eng an hmangaihna hrualhrui iang a phuar loh le?
Dawt leng mai em i sel chung vânpa chhâlin,
A rei lo nang nen kan hlim lai ni.
Buan ang pawm lai zan duhawmah,
"Sam ang ka ṭhen lo'ng che lalnunnem."
Dawt leng maian kan phal thei lo;
Tunah mi chhiah a riang laikhum chauh maw.
Hlimthla thir luaithlinul ban zai rel har ka ti,
Aw min hnêmtu di khawiah ṭuan ta che maw.
Hmatiang sawn zâi rêl tlei par dang han chhai leh zawng,
Ka zuam mawlh lo, thinlaiah riah rûn i rem tawh si.
Ṭha pâr dang zawng der biahzai va hlan la,
Thinglung lalram i din leh ang, vul lai par thang turin.
Lei ropui hausakna pâr zawng chuaia ral mai tur,
Thinlung hmangaihna chu chatuana vul zâi rêl tur.

08/11/2024

*LEN DUN KA NUAM*
_Valsêna Chhangte_

Kumsul liam tuai ang thar leng val tam chhuah hnu paw'n,
A nem lo khuangruah ang thinlaiah lo sur e.
Sawmfâng tualah kâwltu chawia thlanfim farin,
Lâwmnu biang tai siktui min dâwn hlimlai lo ni.
Ngûrpui dawn luat lunglai mawl bilh thu lo hrângin,
A tir ta thanrel mi hrâng, vangkhaw lamtluangah.
Vangkhua senmei chan tir ka di râl ang kaiin,
Chhaktiang luiral hrumzial mi hrâng vangkhua kâi e.
Senthi sakruang tui ang luang val lung lo vaiin,
Chhannan laitha reng zâm lo, fâm ang lo chuai e.
Lungdi tlan nan sial thum chengrâng ṭhi lo ngiatin,
Hnamchawm val neih atlem lua than lai lo tlawm e.
Zai chawi than khua sei se i sal behna rûnah,
Beisei hlimni chhiar ṭahlai bang hian ka ring ṭhin.
Di zun ngaihlai awmhar lunglen dâwn lo reng a,
Chhawrthlapui êng no nghiai thiang leng lai lo chuai maw.
Ngûrpui nun iang lo rairah riang vaihna rûnah,
Nghilh reng awm lo ṭah mittui i tan lo hlan e.
Pialral famkhua pawl lungmawl sai chang dawn mah i,
Nghâk zel nang lungdi ngaihlai puan ang chul si lo.
S*kni êng leng zawg di rûn hlimlai lo chenin,
Hrual hrui ang lo sei leh ṭhin i zun thinlaiah.
Chawngmawi leh hrangchhuan iang si-âr chang thei ila,
Piallei ngai lo thangvân mawiin lendun ka nuam.

08/11/2024

*CHAWNGTINLERH RAM*
_Valsêna Chhangte_

Chhaktiang ram kâwlvalenchham lamtluang ka chhui,
Chawngtinlerh ram buannel chhur rual siahthing ngirna.
Chhawkhlei thingsam thang mawi siktui thiang luang ri nen,
Vah loh siahthing hnuaiah turni a mâwi zo lo.
Vangkhaw mawitu sîrva leng zuk chal thawm ri nen,
Lungrual leng zàin siamtu fak zâi lo rêl e.
Than rêl mi hrâng kiang tual chai ang hlim zâi vâwrin,
Lungmawl duh sam suangtuah kal lai athui vawng vawng.
Siahthing bel nauban vul di zun ngaihlai thoin,
Di, ṭhiangleng biahzâi hlana buan ang pawm ka nuam.
Aikim mi hrâng chenrâng chawi duhthâl chai tur chu,
Dawnin a iang sa pel hla do chham ve ka nuam.
Kei pawh an zûl dim thawm lo pheilâi khai zelin,
Sa leh pârtin veh nang hmeh det hlimtla lain.
Khuavel thang se kan zo hmun lasi vangkhaw mâwi,
Chitin hiptu rohlu tuai thar hlut rêl zel se.
Raltiang ram reng ngai lo zâi sà hlim lai chenin,
Zantiang awian tawn ve ka nuam lasi hmelṭha.
Hlimthla lain ṭhiangte'n chawnbânah kài ila,
Tùfà hnen chhuangte'n hrilh vean ka nuam mang e.

08/11/2024

DAWT LENG MAI AN CHANG DAWN EM NI?
Valsêna Chhangte

Perhkhuang hrui rimawi chawiin, hringnun hla mawi kan rem dun a,
I thinlungah riah rem zai relin, Lalram ropui kan din dun ṭhin lo em ni?
Hla leh rimawi karah chauh i lo thâm vel a,
Thinlung chhungril hmangaihna i hre thiam si lo.
Thlado lerah chawnpui a vul leh vaw vaw ṭhin ang hian,
Hringnun hi kan tan i vul thar tir leh dawn lo em ni?
Tuipui fawn vel te hi hmangaihna hian do letin,
Chhanhimna lawng leng a ko thei tih hi ka lo hrilh lo palh che ani di.
Zunleng karah mittui lo luangin, siahthing kungpui a nget zo a,
"Rinawmna tiang lektu a fam ta" an ti maw?
Siamtu'n hnah thar thlak ṭhin siahthing pawh avul tir a nih ngai chuan,
Hringnun hla mawi zawma thang leh tur hian min sitin ka ring lo asin.
Lei chhal leh vân chhala rinawm biahzai kan tiam kha;
Di, dawt leng mai an chang dawn em ni?

LO KIR LEH LA Valsêna ChhangteChhak tiang kâwl a lo ngui a,Malsawm khuangruah lo surin,Thliah hnu zûn lêng a lo zâm ...
01/04/2024

LO KIR LEH LA
Valsêna Chhangte

Chhak tiang kâwl a lo ngui a,
Malsawm khuangruah lo surin,
Thliah hnu zûn lêng a lo zâm a,
Tawn leh châkin nunhlui mual liam hnu ka thlir.
Suihlunglèn ti zual kaina rûn vaiin,
Zantiang laikhum ka tan ṭahna lo ni.
Damthli iang i thinlung hmangaihnain mi chhem leh la,
In tawng leh ngei ang aw zantiang tawnmangah tal.
Dì, ṭuahpui leh vau vulin mawite'n ṭhiang len an rel a,
A zar hnuaiah kan vul lai kha dâwn ve la lalte,
Suihlung lêngin i thâm lo bîk ang em ni?
Khuanu ruat ṭhen loh biahnêm em min hlan ka lo ti;
Ka ngai thiam lo laltè, eng ngan sam ang mi ṭhen le?
Van duai hringnun mi chhiah mahla,
Thinlaiah i châm i zûn ngaih ka bang si lo.
Suihlung damte'n lo kir leh la,
Chutin riang hluan ṭah lai ka bang ang.

16/06/2023

*KA TAN I LO VA HLU TAK EM!*
_Valsêna Chhangte_

Ka nuna pangpar mawi ber chu i ni a,
Ka ro hlu ber chu i ni.
Suangtuahna thla zara beiseina êng min hmuh tir ṭhintu chu i ni a,
He ka khawvela ka hlimna ber chu i ni.
Nun siktui kara damthli leng chuan min chhem a,
Kan nun khuai ang râu tur i chelh ding ṭhin.
Hlimna tuifawn vel karah suangtuahnain ram ropui min din pui a,
Ani, tah chuan kan kar hmangaihna chu a vul mawi ṭhin si.
Rin hlehna ten min chim buai loh nan ka tan i rinawm reng a,
Rinawmna kan tiam tawh kha khing thla zo reng an awm lo.
Ka hmangaihna thlazar hnuaiah hmangaihtu leh hmangaihte hlutna min hrilh a,
Ka tan lawmna par ang a vul leh ṭhin.
Nun rimawi fawn vel karah nun thuruk min ziah sak a,
Famkim lo mihring hi famkimna no mi chawi tir si ṭhin.
Harsat buaina karah ka tan i ding reng fo va,
Ka tan i lo va hlu tak em!

Valsêna Chhangte

11/07/2022

*I DAWN VE LO MAW?*
_Valsêna Chhangte_

Hringnun perkhuang chu tumin hringnun ka chaih a,
Ka fan ngai loh ram suangtuahin ka châk- hal a;
Thih duh si lo vin, hringnun ka hlut zo lo va,
Mite hlimpui hmangaihna hi ka ṭahpui ṭhin.
Duh vanga duan loh he hringnun hian min hnuk a,
Ka beiseina lamtluang chhimbal ang a ral si;
Lungngaihna tuipui fawn hauh reh tumin ka sual,
An hnai si lo, hnehtu krista sipai rual te.
Khawiah nge samari mi ṭha lo kal tur chu?
Beiseina thamral mai tur em lo ni hringnun?
Awm tak maw an sawi chatuan pialral rûn nuam chu?
Tah chuan "dam diaiin an leng za an" ti asin!
Mi sai ang maw kawngkhar vengtu pawl lungmawlan?
Kei zawng vanduai tur renga khua ruat ka lo ni;
I dâwn ve lo maw, hmangaihtu thinglung hliam hi?
An ka nem chhang la nem ten mi chawi rawh thanghniang.
Ka tan chham ang zal na tuahrem laikhum zau hi,
Ka bel rei lua rianghlei ṭah khua ti sei rengan;
Rûn hmun len ka châk nichhun zantiang tawi an maw,
Duh thu lo ka tang, i hmangaih zun leng zâmah.

28/08/2021

*CHAWL TUI NINGZU*
_Valsêna Chhangte_

Hmanah zofa leng ngurpui thum bel tho chawiin,
Sem sem an hlim thlei awm lo chawngchen par tlan e;
Kheh eng ki leh tawn zelin ropui par an tlan,
Thlawipa zai vawr an zawm khuangpui ri hluan hluanin.
La leh val rual di bik awm lo sir tiang sawnin,
Zantiang si-âr hnuaiah mu ang leng der der e;
Hlim nan an dâwn chawl tui ningzu lung mawl lo ten,
Râl ngam mi hráng an voh chawimawi nopui hlanin.
Mahse, ṭhang thar chawl tui ningzu dawn ve chu e,
Lunglai mawlin senthi an chhuah râl ang lian e;
Ngawl vei zuapa lunglai lian thai leh hrai ṭapin,
Sam ang a ṭhen ta rairah tur dawn phak si lo.
Puar hmai sen ṭawk lunglai nain lunglen a kiu,
Bo hnu chhir sawt lo lungpuam mittui a luang si;
Sakruang laitha zam lo chungpa in bawrh bangin,
Damna rûnah tui ang dai famkhua a lawi ta.
Raih rah sennau lunglai naiin "ka pa, ka pa"
Sakhming koh chhang si lo vaihna khua sei thlawn e;
Hringnun tawitu chawl tui ning zu dâwn lo zawk la,
Hringnun vul lai pâr thang mawi tur chu dâwn zawk rawh.

26/08/2021

*I HARH THUAI ANG ZOFA LENGTE.*
_Valsêna Chhangte_

Hmanah pipu te zauh sah sa,
Kawivai lungmawlin an rûn e;
Pen zau kawrvai dawt leng sel chu,
Ngûrpui dawn ti tawitu lo ni.
Hmatiang sawna phei khai zelin,
An la ṭuan kan relna tlang dur;
Râl hrat mi kâwl chengrang a au,
Puan var vaiin kâwng ang tlan e.
Mi hrâng sahrâng hma zam ngai lo,
Thinglung huai ngam loh chang mah i;
Chem lo râl hrat huai lu an la,
Todelh lo zofa leng kan rum.
Dawn changin thinlai ruk a na,
I har thuai ang zofa leng te;
Sawmfang tluangpui dai ang dangin,
Diriam an nui kawrvai rûnah.
Chhak ram mah sawmfang kur si e,
Khuanu pek ram a vul ve thei;
Taimak thawhrim nun nei vein,
Kan thang ang khuavel leng zingah.
Thiam fin pumpui ṭang bei lo se,
Rual ṭan tlangah lengin awi ang;
Chul nun hlui a vul leh ang a,
Kawrvai an tlawlh ang thlang sawnin.

24/08/2021

*Acrostic poem*

Ngaih lo ang mual a liam ta ṭha val dang tawnah,
Hun leh nun ka hloh zawng te kir hian an mawi lo,
I sul i hnu fan changin thinlai a hnîm ruai,
Lem ang mi der maw nau ang ka ṭah khua sei lua,
Hnem thiam reng an awm si lo ka di, nang lo chu,
Buan ang pawm lai ka ngai zual fur khawthiang karah,
Iang zo reng an awm lo i sakhmel ṭha sensiar,
Khuanu hma tiam tawh thu zawng kha ka dâwn kir a,
Suihlung ka phang vul tawh lo tur zun leng ngaiin,
Uaia chul mai an zawng ka phal lo kan nun kha!
Hrilh ka hai tawn tur awm lo i liam ta si a,
Awm lo ngaia rumin zankhua a sei leh ṭhin.
Riang hlei ka ṭahnan mai maw sultam kan in zui,
I phal dawn bîk em ni k*mtluang sam ang ṭhen chu?
Ni chhun zantiang a rei lua nang lo a len chu,
Puan ang min hnawl khua rei k*m sul a vei ta si,
Uan pui i sakhmel ṭuangṭuah par ang vul zel se,
I thinlung chhawl ang thle tawn reng hi bang rawh se.

Valsêna Chhangte

Address

Aizawl

Telephone

+19366154342

Website

Alerts

Be the first to know and let us send you an email when MIZO POEtry posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to MIZO POEtry:

Shortcuts

Share