09/09/2026
🔴 თაზო მთივლიშვილის მკვლელობის საქმეზე სასამართლოში შოკისმომგვრელი დეტალები გაჟღერდა
თბილისის საქალაქო სასამართლოში თაზო მთივლიშვილის მკვლელობის საქმეზე გამართულ სხდომაზე ერთ-ერთმა მთავარმა მოწმემ, ს.რ-მ 23 წლის ახალგაზრდის სასტიკი წამებისა და მკვლელობის დეტალებზე ისაუბრა.
მისი ჩვენების მიხედვით, თაზო რამდენიმე ეტაპად სასტიკად სცემეს, რა დროსაც მან რამდენჯერმე დაკარგა გონება. მოწმე ასევე საუბრობს სამზარეულოს ხის დაფითა და ნაჯახით თავდასხმის მცდელობაზე და აცხადებს, რომ თაზოს მძიმე მდგომარეობის მიუხედავად, სასწრაფო დახმარების გამოძახების მოთხოვნაზე უარი ითქვა.
სასამართლოში ასევე გაჟღერდა ინფორმაცია, რომ მკვლელობის შემდეგ, სავარაუდოდ, განიხილებოდა ცხედრის დანაწევრების გეგმა. მოწმის განცხადებით, შემთხვევის ადგილზე მყოფ პირებს მობილური ტელეფონები ჩამოართვეს და მათ დანაშაულის გამჟღავნების შემთხვევაში სიცოცხლის მოსპობით დაემუქრნენ.
სხდომაზე კიდევ ერთი მძიმე გარემოება გახდა ცნობილი — ს.რ-ს მტკიცებით, სასამართლოში ჩვენების მიცემამდე პენიტენციურ დაწესებულებაში მას უცნობი პირი შეხვდა, რომელმაც თავი ადვოკატად გააცნო და ჩვენების შეცვლა მოსთხოვა.
საქმეში სულ ხუთი პირი ფიგურირებს. მთავარი ფიგურანტი, 36 წლის გ.პ, რომელიც გამოძიების ვერსიით, მკვლელობის შემდეგ ქვეყნიდან გავიდა და მოგვიანებით რუსეთში დააკავეს, ამ ეტაპზე დუმილის უფლებას იყენებს.
რა მოხდა 23 წლის თაზო მთივლიშვილის დაბადების დღეზე და ვინ უნდა აგოს პასუხი ამ სასტიკი მკვლელობისთვის — ეს არის კითხვები, რომლებზეც სასამართლომ საბოლოო პასუხი უნდა გასცეს.
⚖️ თაზო მთივლიშვილის ოჯახი დამნაშავე პირების უმკაცრესად დასჯას ითხოვს.
#სასამართლო #მკვლელობისსაქმე #თბილისი #სამართალი #ადვოკატი
