02/12/2025
ჩემო ძვირფასო კოლეგებო, მინდა გაცნობოთ, რომ ვმონაწილეობ საქართველოს ადვოკატთა ასოციაციის არჩევნებში აღმასრულებელი საბჭოს წევრობისთვის, ირაკლი ყანდაშვილის გუნდის შემადგენლობაში.
თუ თქვენი ნდობა მოვიპოვე, დაუღალავად ვიშრომებ იმისთვის, რომ ასოციაციას ჰქონდეს კიდევ უფრო გამჭვირვალე და პასუხისმგებლიანი მმართველობა, გაძლიერდეს ადვოკატთა სოციალური და პროფესიული დაცვის მექანიზმები, დისციპლინური და ადმინისტრაციული პროცესები უფრო ეფექტიანი გახდეს, განვითარდეს სწავლებისა და ტრენინგების სისტემა და ახალი ადვოკატების მხარდაჭერის მექანიზმები, მე ვიქნები გარანტი იმისა რომ თითოეული ადვოკატის ხმა რეალურად ისმოდეს აღმასრულებელ საბჭოში, ხოლო საერთაშორისო თანამშრომლობა გადაიქცეს პრაქტიკულ შესაძლებლობებად, რომლებიც ასოციაციის განვითარებასა და წევრების გაძლიერებას ემსახურება.
ჩემი კარიერა საადვოკატო სფეროში 2002 წლიდან დღემდე უწყვეტად გრძელდება. ვარ იურიდიული კომპანია „ფრიდონი სიხუაშვილი და პარტნიორები“ დამფუძნებელი და პრეზიდენტი, სპეციალიზაციით ვარ არასრულწლოვანთა მართლმსაჯულების სფეროსა და ბავშვთა უფლებების დაცვის საკითხების ექსპერტი. მაქვს დიდი გამოცდილება სამოქალაქო, ადმინისტრაციულ და სისხლის სამართლის საქმეებში.
გარდა ადგილობრივი გამოცდილებისა, მაქვს მონაწილეობა მიღებული მრავალ საერთაშორისო ტრენინგსა და პროგრამაში ამერიკის იურისტთა ასოციაციის, ნორვეგიის კანონის უზენაესობის მრჩეველთა მისიის ორგანიზებით. 2006 წელს დავაფუძნე ადამიანის უფლებათა დაცვის ასოციაცია „ადვოკატი,“ ხოლო 2007 წლიდან კი ვარ საქართველოს ადვოკატთა ასოციაციის წევრი.
ჩემი საქმიანობა აღიარებულია არაერთი ჯილდოთი, მათ შორის 2016 წელს პოლონეთის და ევროპის ადვოკატთა ასოციაციების მიერ, როგორც პირველი ქართველი ადვოკატი, რომელმაც მიიღო „ბროლის გული“ ჯილდო ადვოკატთა უფლებების დაცვისთვის. 2023 წელს საქართველოს ადვოკატთა დამოუკიდებელი პროფკავშირის გამგეობის ჯილდო მივიღე, ადვოკატის უფლებების მიმართულებით გაწეული წარმატებული საქმიანობისთვის.
ჩემი გეგმა, აღმასრულებელ საბჭოში მუშაობის მიმართულებით - არის გამჭვირვალე, ანგარიშვალდებული და პროფესიული მმართველობის უზრუნველყოფა. დავიცავ თითოეული ადვოკატის უფლებებსა და ინტერესებს, გავაძლიერებ კომიტეტების მუშაობას, სწავლებისა და პროფესიული მხარდაჭერის სისტემებს და შევუწყობ ხელს ასოციაციის როლის გაზრდას ქვეყნის სამართლებრივ სივრცეში.
მოგმართავთ, კოლეგებო და გთხოვთ მხარდაჭერას - რათა ერთად შევქმნათ ძლიერი, ერთიანი და პროფესიონალური ადვოკატთა საზოგადოება, რომელიც დაიცავს სამართლის უზენაესობას და თითოეული ადვოკატის უფლებებს.
თქვენი ხმა მნიშვნელოვანია - მხარი დამიჭირეთ აღმასრულებელი საბჭოს წევრობის კანდიდატურას
