22/08/2026
من حوالي ٣ سنين كان عندي قضية من أغلس القضايا اللي قابلتني في حياتي القضية بدأت بمكالمة تليفون الساعة ١١ بالليل وأنا بطبعي مش برد على حد بعد الساعة ١٠ بالليل لأن مواعيد المكتب من ١٢ الضهر لحد ٨ بالليل
ولو عندي جلسة بروح المكتب بعد الجلسة واللي غالبا مش بتتأخر عن الساعة ٢ الضهر أوصل المكتب أشرب فنجان القهوة وأبدأ شغلي لكن اليوم ده الرقم شدني وربنا أراد إني أرد
رديت بقفله كده بالو قال لي السلام عليكم يا بيه
قلت له اتفضل
أنا بطبعي لما الموكل يتصل بيا بحاول أستقبله كويس لأن اغلب الموكلين لما بيكلموا المحامي يبقى أكيد عنده مشكلة لكن علشان الراجل اتكلم بالليل فكنت قافل الصراحه قال لي ممكن عنوان المكتب يا استاذ علطول كده
السؤال كان غريب شوية والصراحه ردي كان اغرب فقلت له يا فندم عنوان المكتب وتليفونه موجودين على النت اكتب محمد ثابت للمحاماة والاستشارات القانونية هتلاقي الاسم والتليفون والعنوان واللوكيشن
سكت شوية وقال لي يابيه إحنا غلابة تليفونا بزراير
بصراحة زعلت من نفسي حسيت إني أحرجته من غير قصد قلت له وانا بحاول الطف المكالمه ولا يهمك يا أستاذ العنوان كذا وكذا وتشرفني بكرة هستناك ان شاء الله من بعد الساعه ٤ العصر قال لي إن شاء الله يا استاذ هكون في الميعاد
تاني يوم لقيته بيخبط على الباب وداخل عليا راجل عادي جدا متوسط الهيئة وفي منتصف الخمسينات قعد قدامي وقال لي أنا أخويا مات يا أستاذ قلت له البقاء لله ربنا يرحمه وطبعا انا في مخيلتي انه عايز يعمل اعلام وراثه قال لي بعد ما مات اكتشفنا إنه كاتب كل حاجة لمراته قلت له طيب فين المشكلة قال لي كل حاجة يا أستاذ البيت والأرض وكل اللي كان بيملكه قلت له طيب هو حر ده ماله قال لي بس مش كاتب لأولاده قلت له أولاده قال لي بنات يا أستاذ من مراته الاولانيه ماتت يجي من ٦ سنين قلت له يا أستاذ برضه مفيش مشكلة هو من حقه يتصرف في ماله بصراحة في اللحظة دي بدأت أشك فيه قلت لنفسي الراجل غالبا زعلان علشان أخوه كتب كل حاجة لمراته وهو مش هيورث حاجة فقلت له أنا لحد دلوقتي مش شايف مشكلة إيه مشكلتك بالضبط بص لي وقال لي إزاي يا بيه مراته موريانا الورقة اللي كاتبها قلت له الورقة معاك قال لي لا مع مراته قلت له طيب ما هي صاحبتها فين المشكلة قال لي المشكلة إن الورقة دي اتعملت بعد ما أخويا مات سكت وقلت له يعني إيه بعد ما مات قال لي مراته كانت مجهزة الورقة من قبلها بتاريخ قديم وبعد ما مات بصمت الورقة بصيت له وسكت لأن الكلام ده مش بسيط قلت له إنت عرفت الكلام ده منين قال لي أنا ما شوفتهاش وهي بتعمل كده قلت له أمال عرفت إزاي قال لي هي اللي كشفت نفسها انا بقي ساعتها قلت لنفسي ياعني انت جاي تضيع وقتي علشان زعلان من الميراث اللي راح عليك
قالي هقول لحضرتك بعد وفاة أخويا مراته كانت هادية جدًا وبعد كام يوم طلعت الورقة وقالت لي دي ورقة قديمة واخوك كان عاملها قبل ما يموت في الأول انا ما كنتش مصدق إن ممكن تكون عملت حاجة لكن كنت مستغرب
اول حاجه ماكنش بيعرف يكتب وتاني حاجه سره كان معايا و عمره ما قال لي إنه ناوي يدي كل حاجة لمراته بدأت اشك بس ما روحتش اقولها علي حاجه بدأت ادور وانخور وراها مسكت ورق اخويا القديم شوية عقود ايجار كام قيراط علي شوية إيصالات وتوكيل كان عامله ليا علشان ابيع ليه حتة ارض ولاحظت حاجة غريبة البصمة الموجودة على الورقة الجديدة شكلها وطريقتها مش زي بصمته القديمة لكن ده برضه ما كانش كفاية فضلت ادور وراها لحد ما اكتشفت حاجة مهمه تاريخ الورقة كان قديم لكن في التاريخ ده بالذات اخويا كان في مكان تاني
قلت ازنقه فقلت له يا استاذ هي الورقه مش معاك قالي لا معاها بس انا معايا صورتها خلتها تصورهالي علشان قلت لها ان المحامي عايز صوره علشان ينقلك الحاجه ليكي قلت له ماشي وطبعا انا مش مقتنع بالاجابه دي فقلت له اخوك الله يرحمه كان فين بقي يا استاذ في تاريخ الورقه دي
قالي كان في المستشفي العام ومكانش قايل لحد علشان ميخضهومش وقالهم انه مسافر الصعيد عنده شغل وقعد ٥ ايام بصراحه هنا بدأت اشك سالته قلت حاجه لمراته انك شاكك في حاجه قالي لا يا بيه علشان متاخدش احتياطها كنت بس بسالها أسئلة عادية الورقة اتعملت إمتي وكانت فين ومين كان موجود وقتها ومردتش ازود احسن ما تاخدش بالها وكل مرة كانت بتقول كلام مختلف لحد ما في مرة قالت لي هو كان سايب الورقة دي عندي من زمان سألتها من إمتى قالت لي والوقت اللي قالت لي عليه كان في المستشفي فيه بقيت بقنع نفسي ان الراجل اللي قدامي مش بيحاول ياخد فلوس أخوه الراجل بيحاول يعرف الحقيقة لما حكى لي كل ده قلت له بص يا أستاذ إحنا ما ينفعش نتهم حد لمجرد الشك لازم يكون عندنا دليل
طبعا بدات اجمع الورق والعقود القديمه والايصالات وعملت المحضر والنيابه طلبتها وطلبنا التحقيق في الورقة والبصمة وتاريخ تحريرها والنيابة بدأت التحقيق والموضوع طلع بجد
اللي حصل واقرته مراته انها خلت حد يكتبلها الورقه زي ما قالت لاخو جوزها ولما اخو جوزها قال لها طيب ما تخليني اقابل الراجل ده قالت له انه صاحب جوزها ومتعرفش عنه حاجه لكن قدام النيابه قالت عليه والنيابه اتاكدت منه انها طلبت منه انه يكتب الورقه دي واعترف طبعا عليها والمفاجاه بقي انها بصمته علي الورقه دي يوم وفاته وهو علي السرير ميت وانها عملت كده علشان تامن مستقبلها
امرت النيابه ساعتها بحبسها والموضوع خلص والصراحه انا معرفتش ايه اللي حصل بعد كده علشان دوري كان خلص
لان وقتها الموضوع ما بقاش مجرد خلاف على ورث القصه دخلت في شبهة تزوير واستعمال محرر مزور وأنا لحد النهارده فاكر المكالمة دي مكالمة الساعة ١١ بالليل والرقم اللي كان سهل اوي عليا ما أردش عليه والراجل اللي أول ما دخل المكتب افتكرته مجرد أخ زعلان علشان مش هياخد من ورث أخوه طلع الموضوع أكبر بكتير
مكالمة واحدة بالليل ممكن تبدأ قضية عمرك ما تنساها وربنا أحيانًا بيخليك ترد على مكالمة أنت أصلًا ما كنتش ناوي ترد عليها
ولسه برضه مبردش علي حد بعد الساعه ١٠ بالليل 😀
