أ/ مؤنس محمد مؤنس - المحامِ, العياط (2026)

23/09/2026

مش معني إن المحضر بتاعك اتحفظ يبقي كده محضرك باظ

لا هو بس اتعطل شوية نتيجة تسرع منك ودي إشكالية بيتم طرحها من ناس كتير بتبقي محررة محاضر في قسم الشرطة التابعة ليه وتروح تسأل عليه في النيابة الموظف يبلغهم إن المحضر اتحفظ ومش عارفين اي الإجراء اللي المفروض يتعمل أو يتصرفوا ازاي لعدم تعاملهم مع النيابات من قبل

والمحاضر بتتحفظ بسبب ان في الغالب الأعم بين الناس في الوقت الحالي كل ما تحصل مشكلة بين طرفين تلاقي الطرفين طالعين جري يتسابقوا علي مين هيعمل محضر في التاني الأول بدون ما ترتب هتقول اي هترفق اي هتاخد حقك ازاي ما هو المحضر مش كلمتين وخلاص هتروح ترميهم في القسم وتروح تنام وتقول حقي راجع

طب هو بدايةً قرار الحفظ ده بيصدر بناءً علي اي؟؟

بيصدر بناءً علي نظرة النيابة للأقوال اللي حضرتك قولتها في المحضر في قسم الشرطة لو النيابة لقت ان الأقوال تستدعي السير في التحقيق بتحقق في الموضوع وبناءً عليه بتصدر قرارها
أما لو لقت إن أقوالك غير موضوعية ولا توجد عليها أي دلائل أو قرائن ترجحها بتصدر قرار بحفظ المحضر من غير ما تحقق فيه أصلاً

وبعيداً عن أي حاجة متقلقش قرار الحفظ ده كده كده قرار إداري لا حجية له علي الإطلاق لا يجوز الطعن فيه وإنما يجوز التظلم منه أمام عضو النيابة الذي أصدره أو أحد رؤسائه ويجوز العدول عنه من عضو النيابة الذي أصدره أو إلغائه من أحد رؤسائه

يعني لما محضرك يتحفظ تقدر تقدم طلب تظلم عادي في النيابة وبيتم استخراج المحضر من الحفظ بس ساعتها لازم تكون مرتب نفسك كويس لإنك هتتسأل في المحضر من تاني ساعتها لازم تكون مجهز أقوالك ، دلائل مثبتة علي الواقعة، كل مايفيد ويقوي من موقفك وتقدر تثبت بيه حقك يكون جاهز

و قبل كل شيء وبعيداً عن إطار القانون الحل الودي والعفو والتسامح أفضل من عداوة المحاكم واللي دخل المحاكم وشاف هيعرف معني كلامي الحلول الودية مكسب للطرفين في جميع الأحوال ولو حد من الطرفين قدر يعفي ويسامح وأجره علي الله مكسبه في الأخرة أكبر بكتير من مكسبه في الدنيا

فيقول رسول الله صلى الله عليه وسلم
(( إذا كان يوم القيامة نادي منادٍ يقول من كان أجره علي الله فليقم للجنة فقالو وما أجره ؟ .... قال العافي
أي من يعفوا وأجره علي الله يدخل الجنة بغير حساب ولأن العفو عند الإحساس بالظلم من أشد وأصعب الأشياء التي من الممكن أن يمر بها إنسان ولا يقدر عليها كل إنسان جعل الله جزاء من يعفوا أن يدخل الجنة بغير حساب

جعلنا الله وإياكم من العافين

🖋️/ مؤنس محمد مؤنس المحامِ

15/09/2026

📌((شرُّكم من ترك عياله بخير وأقبل علي الله بشر))

مشاكل الميراث علي العقارات والأفدنة والقراريط ومين هياخد برة ومين هياخد جوة ومين هياخد علي الواجهة البحرية ومين علي الواجهة القبلية وتوريث حسب المذاج والأهواء

والحقيقة بعد متابعة طويلة لمشاكل الميراث خاصة في البيئة المحيطة بيا في القرية وأحداث كتير بتروح وتيجي بين الورثة وبعضهم البعض اتضح إن في أخر كل خناقة الكل بيطلع منها خسران هي خناقة مفيهاش غالب ومغلوب الكسبان فيها ظاهرياً هو في حقيقة الأمر خاسر والأيام والظروف بتبين ده فيما بعد فمن يظن أنه ربح قطعة أرض علي الواجهة الفلانية أو ربح العقار الفلاني عن طريق الظلم أو التحايل أو الغصب فهو في الحقيقة يحمل في جيبه جمرة من نار

فمن لحظة وقوف الورثة علي باب المحكمة بكمية المشاكل والخلافات اللي بينهم بتبدأ مرحلة الخسارة الحقيقية لكل الأطراف خسارة المال والوقت بل يخسرون ما هو أغلي كانقطاع صلة الرحم وراحة البال وسلامة الصدر لذلك الحل الودي والشرعي هو الحل الأمثل والأصح في جميع الأحوال

ولو أدرك ابن آدم أنها أملاك مؤقتة كيفما زالت عن المورث اليوم ستزول عنه يوماً كوارث وأن الملك كله لله وفهم وتدبر قول المولي عز وجل (( إنا نحن نرث الأرض ومن عليها وإلينا يرجعون)) سيري أن كل ما يملكه سيدعُه برمَّته ثم سيقف بين يدي المولي عز وجل ليسأله حينها من أين لك فماذا أنت بقائل؟

وربنا سبحانه وتعالي ومن مظاهر رحمته بينا جعل الميراث غير قابل للإجتهاد أو ما شابه وإنما هي حدود وأنصبة مفصَّلة تفصيلاً جازماً لا يقبل التأويل فالخناقات اللي بنشوفها وبنسمع عنها دي إنما تنم عن جهل وطمع جامح ناتج عن قلة تربية قلة دين مرض نفسي ناتج عن تربية الآباء للأبناء زي ماانت عايز تقول قول بقا

ومفيش حاجة في الميراث اسمها أصل أنا عملت أصل أنا سويت أصل أنا حقي وأصل انا اللي روحت وجيت كل ده كلام فارغ الشرع لم يعترف به إطلاقاً الحق حق والباطل باطل

محكمة الدنيا تعترف بالأوراق والمستندات أما محكمة الآخرة لها رب عدل رب حق ميزان لا يشوبه خلل

🖋️/مؤنس محمد مؤنس المحامِ

03/09/2026

🚨قانون تسجيل المواليد ساقطي القيد في مصر

والحقيقة إن الموضوع ده «قنبلة موقوتة» حيث يكون الأطفال فيها خارج نطاق حسابات الدولة ورعايتها يعيشون بلا وجود رسمي لا يعترف بهم القانون

والمشرع في مصر جعل تسجيل الأطفال قاسماً مشتركاً بين مصلحة الأحوال المدنية وما بين الصحة

والإجراءات العملية في الموضوع ده الحقيقة يجب إعادة النظر فيها من قبل الدولة المصرية قبل حدوث أي كارثة هيكون الضحايا فيها أطفال معدومي الإرادة والقرار لا ذنب لهم من الأساس هم فقط ضحية إهمال وتكاسل الآباء والأمهات فهي إجراءات مرهقة علي الأرجح تأخذ ما لا يقل عن ثلاثة أشهر وتزيد من يوم بدأ الإجراءات

وفي مصر يحق للزوجين أو أحد الزوجين تسجيل أبنائهم في مدة أقصاها 15 يوم من تاريخ الولادة

جالي حالتين بخصوص الموضوع ده
الحالة الأولي زوجين تم زواجهم من مدة تتخطي السبع سنوات كانت حينها الزوجة لم تبلغ سن الرشد فلم يتم عقد القران الشرعي وتزوجا بعقد عرفي كما يحدث بين الأهالي الآن خاصة وهو الدارج في الأرياف وبعد مدة رزقهم الله بمولود طبعاً وبسبب عدم عقد القران الشرعي وهو إثبات حالة الزوجية لم يستطيعوا تسجيل المولود وبعد مدة وصل فيها الطفل أن أصبح عمره يتخطى الخمس سنوات أي أصبح مقبلاً علي الدخول إلي مرحلة التعليم الإبتدائية تذكرا الزوجين تسجيله وهو إهمال فادح منهم ولم يتم تسجيله حتي تلك اللحظة

والحالة الثانية زوجة بالغة رشيدة أنجبت طفلاً أرادت تسجيله ولكن وبسبب حدوث خلافات زوجية ما بينها وبين زوجها قبل عملية الولادة بفترة امتنع الزوج عن تسجيل مولوده بعد علمه بأنها وضعت فحاولت مراراً وتكراراً التواصل معه للصلح لتسجيل المولود قبل مرور المدة القانونية للتسجيل ولكن رفض الزوج تسجيله ومرت المدة القانونية للتسجيل والأصل أن الأم يحق لها التسجيل بمفردها ولكن لعدم علمها من الناحية القانونية فمرت عليها الفترة القانونية ولم تسجل طفلها

ضحايا الواقعتين هم أطفال حديثي العهد لا يملكون إرادة التصرف أو القرار ضحايا إهمال وتكاسل الآباء والأمهات

من الواجب ومن منطلق روح القانون النظر إلي هؤلاء الأطفال بعين الرحمة وعدم محاسبتهم علي جهل وتقصير الوالدين بكافة السبل التي تراها الدولة بمعاقبة الزوجين أو بغرامتهم بس يتم تسجيل الأطفال بدون إجراءات معقدة

فعشان تسجل طفل ساقط قيد دلوقتي لازم مستندات مثل صور بطاقات الزوجين أو شهادة ميلاد أحد الزوجين في حالة الخلافات الزوجية، قسيمة زواج، استمارة تسجيل مواليد ساقط قيد تختلف حسب السن ، تصوير المولود صور 4*6 لإلصاقها بالاستمارة ، إخطار الولادة من المستشفى اللي تمت فيها عملية الولادة، عمل محضر ساقط قيد في القسم التابع ليه الزوجين وعمل محضر إثبات حالة في حالة تخلف أحد الزوجين عن تسجيل المولود لأحد الخلافات بين الزوجين، وتروح المحكمة بعد يوم أو يومين تجيب صورة رسمية منه وبعد كل ذلك يتم الرجوع لمكتب الصحة لختم الأوراق ثم الرجوع للسجل المدني لمراجعته ثم يتم عمل لجنة تسنين لمراجعة الأوراق تستغرق ما لا يقل عن شهر وتزيد حسب التسهيلات ثم بعد ذلك تستطيع حينها تسجيل المولد واستخراج شهادة ميلاد له

فالطفل عشان يستني مدة تتخطي الأربع شهور افتراضاً لو تم البدء في الإجراءات بعد مرور المدة القانونية مباشرة هي مدة ليست بقليلة فمن الممكن أن تفوت عليه حقوقاً كاد أن يكتسبها لولا عائق التسجيل ما بالك في أطفال بتستني سنين زي الحالة الأولي اللي طرحتها فوق نتيجة تقصير الوالدين خاصة كمان لو الأم مازالت لم تبلغ هيستني مدة أكبر لحد بلوغ الأم

توليت حالة الطفلين وجاري العمل علي تسجيلهم طبقاً للإجراءات ولكن:-

ياريت يتم إمعان النظر في الموضوع ده من قبل الدولة المصرية أو السلطة التشريعية الموجودة في دولتنا ويتم إلغاء تلك الإجراءات العملية المرهقة ويتم تسجيل الطفل طالما قدم الزوجين أو أحد الزوجين إثبات علي العلاقة الزوجية رحمةً ورأفةً بأطفال لا حول لهم ولا قوة فهناك حكم لمحكمة القضاء الإداري بالإسكندرية في حكمها رقم 2809 لسنة 16 قضائية أصدرت حكماً مضمونه بأنه لا يجوز ترك الأطفال تواجه المجهول ولا يجوز لأحد الزوجين ولا لغيرهم أن يعطل تسجيل الطفل بشرط إثبات علاقة الزوجية ياريت يكون فيه حل سريع من الدولة حماية لأطفالنا وأولادنا

🖋️/ مؤنس محمد مؤنس المحامِ

30/08/2026

📌الإبتزاز الإلكتروني

من الجرائم التي أصبحت تنتشر وبكثرة في عهدنا الحاضر نظراً لعدة عوامل أبرزها :ـ
غياب الدين عن عقول الشباب إلا ما رحم ربي أولاً عافانا الله وإياكم

وثانياً تكاسل الآباء والأمهات عن رقابة ومصاحبة الأبناء

وثالثاً سذاجة وغباء الضحية الواقع عليها الإبتزاز

لو جينا نعرف الإبتزاز الإلكتروني هنقول عليه ببساطة كده هو عبارة عن إن حد بيهددك بصورة أو فيديو أو معلومة حساسة عنك عشان يجبرك تعمل حاجة هو عايزها غصب عنك والحمدلله ان القانون المصري حازم وصارم وسريع جداً في قضايا الإبتزاز لأبعد درجة والجريمة تقع علي الجنسين الذكر والأنثي يعني ممكن ولد يبتز بنت وبنت تبتز ولد عادي جداً حتي لا يختلط الأمر علي البعض ويظن أن الجريمة تقع علي الأنثي فقط

والابتزاز أنواع كتيرة منها مثلا إبتزاز الغرض منه التخويف وتشويه سمعة المجني عليه أو ابتزاز مصحوب بطلب زي يا تجيب فلوس يا انشر كذا يا تعملي كذا يا هقول كذا أو ابتزاز عن طريق التهديد بالشتايم وفعل جريمة معينة بشخصك و و و....الخ

وعلي حسب كل نوع يتم توصيف الجُرم المرتكب والعقوبة الواجب تطبيقها والعقوبات في جميع الأنواع مش خفيفة أقل حاجة حبس 6 شهور قد تصل إلي ثلاث سنوات مع الغرامة إن كانت جنحة وتزيد علي ثلاث سنوات وقد تصل إلي المؤبد إن كانت الجريمة تشكل جناية والغرامة المطبقة مبتكونش قليلة لا بالعكس بتكون مبالغ مالية كبيرة حتي تكون رادع للمبتز في بعض الحالات قد تصل إلي نصف مليون جنيه وتزيد حسب توصيف الواقعة

طب خلاص اللي حصل حصل والبنت مثلا بيتم ابتزازها عن طريق شخص بسبب حركة غبية منها عشان تسمع كلمتين حلوين أو هي كانت واثقة في الشخص المبتز ما علينا احنا دلوقتي عايزين نحل الموضوع فلو تعرضت في يوم لجريمة زي كده وحد بيبتزك بحاجة حتي لو تمت برضاكي أو غصب تتصرفي إزاي

أولا لازم وعلي وجه السرعة متتهاونيش في الموضوع وتقعدي خايفة ومرعوبة لإن الخوف والرعب لو تملك من الإنسان بيخلي الإنسان ياخد قرارات أغبي من القرارات السابقة ف بهدوء خالص تعملي الآتي:ـ

توكلي المحامِ الخاص بيكي بتوكيل خاص ينص صراحة علي تقديم البلاغات والشكاوي أمام جهات الشرطة أو النيابة العامة بكدة هتقعدي حضرتك في بيتك معززة مكرمة والمحام بيتولي عمل اللازم لحضرتك في سرية تامة وهيرجعلك حقك في أسرع وقت

ثانياً لازم يكون معاكي الموبايل الواقع عليه الجريمة ويفضل يكون الشات الأصلي موجود أو مصدر الرسائل موجود بتكون أفضل وأقوي عن لو كان معاكي اسكرينات للشات عشان الفحص الفني ومرحلة الفحص الفني هي أهم مرحلة عشان تقدري تجيبي حقك لذلك قولنا فوق لازم وعلي وجه السرعة تتحركي بسرعة لإنك لو انتظرتي قلقاً وخوفاً من الوارد جداً بعض معالم الجريمة تختفي مثل ال IP بتاع الجهاز اللي الشخص بيهددك منه فكونه متغير بيمثل صعوبة في تحديد الشخص الحقيقي مرتكب الواقعة لذلك السرعة مطلوبة

طب لو حضرتك حابة تروحي بشخصك هتطلعي علي مديرية الأمن التابع ليها حضرتك ويفضل يفضل يفضل للمرة التالتة يكون مع حضرتك محامِ حتي لو هتروحي بشخصك حتي يتم تحرير المحضر بصياغة قانونية لا تدينك في يوم من الأيام وتفادي الثغرات التي قد يستفيد منها المبتز وهتحرري محضر في إدارة التكنولوجيا والمعلومات وهتقابلي الظابط المختص وهتحكيله الحقيقة والواقعة كاملة وهو هيحرر كل ده في محضر رسمي ولوهلة هتفكري إنك هتقابلي أو هتعاملي بمعاملة سيئة لا إطلاقاً هتتعاملي بكل آدمية واحترام ودي تعليمات صارمة عليهم هناك حتي تطمأني وتعرفي تاخدي حقك مرتاح

طبعاً هيجي في بالك سؤال طب انا خايفة من أهلي والفضيحة قدامهم أقول لحضرتك طالما حضرتك بالغة يحق ليكي عمل المحضر بكل سرية تامة لحد ما يتم توقيع العقوبة علي الشخص المبتز لا هيتم التواصل مع أهلك ولا مع أي حد له علاقة بيكي والمختص بيبقي فاهم وعارف ان حضرتك جاياله في مشكلة شرف والموضوع حساس بالنسبالك لذلك أنتِ فقط صاحبة الشأن ومن حقك اتخاذ كافة الإجراءات القانونية المطلوبة بمفردك

في النهاية أحياناً يكون البلاء عبارة عن رسالة شديدة اللهجة من المولي عز وجل للرجوع والتوبة إلي الله وتذكيرنا بصفة عظيمة من صفاته وهي (الستر) لو زالت عن أحد منَّا لما استطاع أي منَّا النظر في وجه الآخر الستر نعمة عظيمة ربنا يديمها علينا وعلي كل أهالينا فاللهم استرنا فوق الارض وتحت الارض ويوم العرض عليك

🖋️/ مؤنس محمد مؤنس المحامِ

25/08/2026

📍مش كل الحقوق مجابة !!

يعني تخيل يكون ليك حق واضح وظاهر بس قانوناً وعملياً مش حقك !!

يعني اي يااستاذ عايز تقولي إن ليا حق عند واحد والكل عارف أنه حقي ومعرفش أخده ؟؟!
ـــــــــــــــــــــــــــــــــــــــــ
هقولك تعالي ومع بعض كده وواحدة واحدة هشرحلك كل حاجة بص يا سيدي
اتعلمنا في الكلية أن الحرية هي الأصل العام في استعمال الحقوق وده اللي نصت عليه المادة (4) من القانون المدني يعني بالبلدي كده استعمل حقك براحتك طول ماانت مسببتش أو قصدت تسبب ضرر لغيرك من ورا استعمالك لحقك طالما بتستعمل حقك استعمال مشروع لو سببت ضرر لغيرك ف انت قانوناً غير مطالب بتعويض الغير عن ذلك الضرر طالما استعملت حقك في نطاق المشروعية
ــــــــــــــــــــــــــــــــــــــ
ولكن جت المادة (5) من القانون المدني ووضعت حد للإنحراف والتعسف في استعمال الحقوق وده اللي هنتكلم عنه النهاردة وهو ((التعسف في استعمال الحق))
ــــــــــــــــــــــــــــــــــــ
المادة (5) جت وقالت يكون استعمال الحق غير مشروعاً إذا لم يقصد به سوي الإضرار بالغير يعني المفروض انت لما تستعمل حقك بتستعمله من أجل مصلحة ليك ف لما تيجي تستعمله عشان تضر غيرك انت هنا رجحت ضرر الغير علي مصلحتك أصبح استعمالك لحقك الذي خوَّله لك القانون هنا حق غير مشروع ومصلحة غير مشروعة وتتحق المسؤولية التقصيرية تجاهك وتلتزم بتعويض المضرور إن أصابه ضرر
ــــــــــــــــــــــــــــــــــ
بعض الأمثلة عشان الصورة تبقي واضحة ليك عشان متتوهش مني
دلوقتي انا شاري بيت وانت شاري بيت لازق فيا جيت انا في بيتي روحت عامل سور عالي( حيطة عالية) عامله ونا قاصد أضرك عشان أمنع عنك إنارة عواميد الكهرباء أمنع عنك الهواء أي حاجة المهم انا قاصد أضرك هنا القانون رغم إني باني في ملكي وفي حقي يجي في صفك انت كمضرور ويلزمني بهدم السور أو الحيطة نظراً للتعسف في استعمال الحق الذي قصد به الإضرار المحض بالغير وهو أنت

مثال تاني انا وانت جيران ونا عايز أوصل ماسورة مياه لبيتي وعشان أعدي الماسورة دي لبيتي مفيش طريق غير إني أعديها من جمب بيتك ولن تسبب لك أي ضرر وجيت استأذنتك لو سمحت يا فلان هعمل كذا كذا وانت رفضت لسبب تافه ميعتبرش سبب أصلا هنا مع أنه حقك انك ترفض انك تعديلي الماسورة من جمب بيتك ولكن القانون يقع في صفي نظراً لتفاهة سبب الرفض مقارنة بحجم الضرر اللي هيقع عليا إنك تمنع عني المياة وتعتبر متعسفاً في استعمال حقك وده لا يجوز
ــــــــــــــــــــــــــــــــــــــــ
واحد هيسألني سؤال طب يا أستاذ دلوقتي إزاي أنفي عني تهمة التعسف في استعمال الحق منا ممكن تحصل معايا مشكلة زي كده في يوم والكل يبقي شايفني متعسف في استعمال حقي بس الحقيقة غير كده أثبتها إزاي ؟؟

أقولك تعالي دلوقتي انا شاري حتة أرض وانت شاري حتة أرض لازقة فيا وفيه بيني وبينك مشاكل علي حتة الأرض بتاعتك بسبب ان أكتر من مرة عرضت عليك أشتري حتة الأرض بتاعتك وانت رفضت ثم بعد ذلك جيت روحت باني علي الأرض بتاعتي عمارة ثم بعد كده اتضح ان جيت علي جزء من أرضك حتي ولو مساحة قليلة ونا ببني العمارة بتاعتي جيت روحت جايلك قولتلك ياعم شوف الجزء اللي انا جيت عليه من أرضك يساوي كام ونا هدفعهولك جيت قولتلي لا انا عايز الجزء اللي انت خدته وبنيت عليه طبعاً انت في نظر القانون كده متعسف في استعمال حقك عايز تهد العمارة بتاعتي عشان حتة صغيرة من الأرض بتاعتك انا جيت عليها مع إني جيت وقولتلك شوف تمنها كام ونا هدفعهولك !!

عشان تنفي عنك تهمة التعسف في استعمال الحق في موقف زي ده لازم أول حاجة تثبتها هي (( سوء النية)) ركز في المصطلح ده أوي
ـــــــــــــــــــــــــــــ
الأول نفرق بين (( حسن النية وسوء النية))

حسن النية يعني ونا ببني العمارة بتاعتي المهندس اللي بيرسم لي العمارة بتاعتي عشان ابنيها وقع في غلطة غير مقصودة في الرسم ومخدش باله خالص أنه جه ع أرض جاري عن جهل منه هنا ده حسن نية مقصدش بيه خالص أنه يضرك أو يجي علي أرض مع العلم إني ملزم إني أعوضك تعويض عادل عن الجزء المفقود من أرضك وده اللي أوضحته المادة (928) من القانون المدني
ــــــــــــــــــــــــــــــ
طب نيجي لسوء النية زي ما قولنا فوق انا عرضت عليك تبيع لي أرضك أكتر من مرة وانت بترفض جيت روحت عامل نفسي مش واخد بالي وروحت ونا ببني العمارة بتاعتي عشان أخليها عمارة مربعة ومفيهاش غلطة روحت جاي علي جزء من أرضك هنا أنا متعمد التعدي علي أرضك لتحقيق ميزة كنت عايز أعملها في أرضي معرفتش أعملها بسبب رفضك لبيع الأرض فقولت أعمل مش واخد بالي وابني وخلاص
لو قدرت تثبت سوء النية اللي انا قمت بيه ده أقع أنا تحت طائلة القانون وأصبح غاصب متعدٍ تسقط عني أي حماية قانونية ويكون ليك الحق المطلق إنك تطالب بهدم العمارة عشان جزء الأرض بتاعتك وإعادة الحال إلي ما كان عليه علي نفقة المتعدي بالإضافة إلي التعويض وده اللي أوضحته المادة (924)مدني فالقانون لا يقبل أن يتذرع المعتدي بالتعسف ليجبرك علي البيع قسراً نتيجة تحايله علي القانون
ــــــــــــــــــــــــــــــــ
أما عن كيفية إثبات سوء النية أمام المحكمة فتترك للمحامِ الخاص بك هو كفيل بعمل كافة الإجراءات القانونية التي تصب في صالحك

ملحوظة :- حتي لا تقع أنت تحت بند سوء النية رغم أنك صاحب حق لابد أن يكون القصد من وراء مطالبتك بهدم البناء هو عودة الجزء المفقود من أرضك فقط وليس الإضرار بجارك أيضاً بما يعني
دلوقتي انت شايف جارك بيبني عمارة وجه علي جزء من أرضك وشايفه لسة بيعمل أساس العمارة أو بني دور واحد من العمارة ما هو مش هيبني العمارة في يوم وليلة دي ممكن تاخد منه شهور متجيش تستني لما يكمل العمارة كاملة 11،12 دور وتيجي تطالب بحقك وانت شايف حقك من بدري وكان ممكن تطالب بيه لكن انت استنيت لما يخلص خالص عشان الضرر اللي يقع عليه يكون أكبر عن ما كان لو لسة دور واحد مبدأ سوء النية واسع ومتشعب والقانون زي ما بيحمي الحق بيحمي المصلحة
ــــــــــــــــــــــــــــــــــــــ
🖋️ أ/ مؤنس محمد مؤنس المحامِ
نسأل الله التوفيق والسداد

23/08/2026

بعض الأشخاص لما بتروح ترخَّص وسيلة نقل خاصة بيهم في المرور التابعة ليه بيطلبوا منهم عمل إجراء روتيني إسمه إستعلام أمني علي البطاقة الشخصية
ـــــــــــــــــــــــــــــــــــــــــــــــ
لما بتعمله بيفاجأ الشخص إن ممكن يطلع عليه قضايا هو ميعرفش عنها حاجة لكن الإسم إسمه فعلاً وكتير بيتخض وازاي وامتا وفين ده حصل وبالتالي لا يتم ترخيص الوسيلة إلا لما تجيب ما يفيد عدم صلتك بتلك القضايا
ــــــــــــــــــــــــــــــــــــــــــــــ
في الحقيقة الموضوع سهل وبسيط يتم الفصل في تلك المسألة عن طريق الرقم القومي أو الإسم الرباعي أو الخماسي إن وجد والعنوان وحده لا يكفي نظراً لإن من الوارد أن يكون للشخص الواحد أكثر من عنوان
ــــــــــــــــــــــــــــــــــــــــــــــ
ما عليك سوي التوجه للمحامِ الخاص بيك وده الحل الأفضل والأمثل لاعتبارات عملية كتير وهو هيتكفل بعمل كافة الإجراءات القانونية لاستخراج إفادة في تلك القضايا تدل علي أنها غير مقيدة ضدك بالفعل وغير خاصة بيك ومجرد تشابه أسماء وأنك لست المعني بالإتهام أما في حالة أنها مقيدة ضدك بالفعل وخاصة بيك فالإجراء المطلوب عمله مغاير تماماً لاستخراج الإفادة
ــــــــــــــــــــــــــــــــــــــــــــــ
أو تتوجه بشخصك للنيابة التابع ليها القضايا الظاهرة عليك وتطلب عمل إفادة عما إذا كانت القضايا الظاهرة عليك خاصة بشخصك أم غير خاصة وده حل أصعب شوية نظراً لعدم وجود خبرة كافية لدي بعض الأشخاص في التعامل مع النيابات لإنك زي ما هيوجهك الموظف هتروح بدون معرفتك الكافية أن هذا الإجراء صحيح أم مضر ليك كشخص لإن في بعض الأحوال بتطلب النيابة عمل تحريات عن الشخص المعني بالإتهام فعلياً فلو طلب منك الموظف لعدم وجود بيانات كافية لديه التوجه إلى القسم كذا التابع ليه تلك القضايا لعمل تحريات علي شخصك لنفي مسئوليتك عن تلك القضايا وأنها غير خاصة بيك أم خاصة بيك بالفعل هتبدأ تتوجه ولكن فور دخولك القسم من الوارد جداً أن يتم التحفظ والقبض عليك حتي يتم إثبات أنك لست المعني بالإتهام عن تلك القضايا فالحل الأمثل هو تفويض محامِ خاص بيك لحل مسألتك علي وجه السرعة وبدون تعقيد

19/08/2026

📌 الحرية ليها تمن
ــــــــــــــــــــــــــــــــــــــ
أكبر نصيحة ممكن الواحد يقدمها لأي شخص هي..
( خليك محترم قبل ما يكون عشانك عشان أي حد ليه حق عليك سواء أهلك أو كل من له علاقة بك)

السجون مليانة بالآباء والأمهات والشباب منهم الظالم والمظلوم ومنهم اللي فتح للدنيا صدره وكأنه مالكها ودلوقتي بيتحسر علي حاله
إحساس تقييد حريتك كشخص ربنا خلقك معزز مكرَّم حر إحساس صعب

بنلاقي رجالة بشنبات بتعيط علي حالها بسبب غلطة لو العمر اتعاد بيهم ألف مرة مش هيغلطوها أبداً لأجل أنهم يكونوا أحرار وسط زوجاتهم وأبنائهم وأهلهم

شوفت أمهات قلبها بيتحرق من العياط علي ولادها بسبب قلة التربية أولاً ثم غفلة وسذاجة الأبناء ثانياً لإن اللي بيربي بيربي نفسه أولاً وآخراً

شوفت نظرات أطفال وشباب وبنات لأحد والديهم نظرات حسرة وانكسار اللي هو نفسهم ياخدو والدهم أو والدتهم في أيديهم وهما مروحين بس للأسف فات الآوان أخرهم يقعدوا معاهم دقائق معدودة في أوقات الزيارة المسموح بيها فقط

وغيره وغيره وغيره كتير وانت كإنسان كده كده هتتربي يا تتربي بالمجاهدة والبعد عن الغلط يا تتربي بالبلاء ودي صدقني هتبقي رباية مرة و طعمها علقم أوي عليك

(مَّنْ عَمِلَ صَالِحًا فَلِنَفْسِهِ ۖ وَمَنْ أَسَاءَ فَعَلَيْهَا ۗ وَمَا رَبُّكَ بِظَلَّامٍ لِّلْعَبِيدِ)

ربنا يحفظ أهالينا ويحفظ كل صغير وكبير لأهله وفرجٌ قريب لكل مكروب

17/08/2026

كلنا تابعنا الواقعة المثارة حالياً المعروفة بقضية سوهاج ألا وهي مقتل رجلين وامرأة علي يد زوجها
العامة من الناس بدافع العاطفة يتسائل هل من الناحية القانونية الزوج يعاقب بالإعدام أم أن التصرف الذي أقدم عليه تصرف قانوني ومباح بدافع الشرف وإن ده الصح وراجل وحافظ علي شرفه وكرامته و و و...الخ ويحكم عليه بالبراءة؟
الحقيقة لو سردنا الأحداث المتداولة حالياً والمعروفة للجميع وهي إن القتيلة كانت علي علاقة بأحد جيرانها وأقامت معه علاقة زنا عدة مرات وقام القتيل الأول بتصويرها وتهديدها مراراً وتكراراً بأن تقوم بنفس العلاقة مع صديقه ثم رضخت القتيلة للتهديدات وأقامت علاقة زنا مع القتيل الثاني ومن ثم تم تصويرها وبدأت التهديدات من الرجلين تتزايد يوماً بعد يوم مثل الحصول علي مبالغ مالية من القتيلة مقابل عدم نشر الفيديوهات إلي أن وصل الحال بها إلي عدم قدرتها علي دفع المطلوب فتم إرسال الفيديوهات من حساب مجهول إلي الزوج المسافر خارج البلاد وبعد معرفته بالواقعة عن طريق الفيديوهات المرسلة إليه ثار غضباً ورجع إلي بلدته عازماً علي قتل كل أطراف الواقعة بعد أن اعترفت له زوجته بأحداث الواقعة وكيف بدأت وكيف انتهت...
طبعاً حتي الآن لا توجد أي معلومات مؤكده عن الواقعة نظراً لأن الواقعة مازالت في مرحلة التحريات والتحقيقات أمام النيابة العامة
وبتناول الواقعة من الناحية القانونية طبقا للأحداث المثارة حالياً فقط فهل يعاقب الزوج فعلاً بالإعدام أم في قادم الأيام تحكم ببرائته؟
هل يعاقب طبقاً للقواعد العامة في جريمة القتل وياخد إعدام أو سجن مؤبد أم يعاقب طبقاً للعذر المخفف المنصوص عليه في المادة 237 من قانون العقوبات التي تنص علي أن الزوج الذي فاجأ زوجته حال تلبسها بالزنا وقتلها في الحال هي ومن تزني معه يعاقب بالحبس بدلاً من العقوبات المقررة في نص المادة 234 و 236 الخاصين بجريمة القتل العمد...
هنا صفة الجاني المطلوبة في المادة متوفرة ألا وهي الزوج يعني مش أخ مش إبن مش أب
تاني شرط أن يكون الزواج صحيح وقائماً متكونش الزوجة مطلقة طلقة بائنة أو زواج باطل وده برضوا متوفر والزواج قائم وصحيح مكتمل الأركان
تالت شرط المفاجأة حال تلبسها بالزنا طبقا للواقعة الشرط ده لم يتوفر هو هنا الزوج لم يكتشف الجريمة حال وقوعها أو حتي بعد وقوعها ببرهة يسيرة أو حتي رأي الزوجة في مكان لا يدع مجالاً للشك أن هناك حالة زنا زي وجود الزوجة في مكان مغلق مع أحد القتلي وأيضاً لم يقم بقتلهم حال تلبسهم بالزنا ده كان شغال وقطع شغله ورجع من سفره كل ده ياخد أيام يعني من الآخر يوجد سبق وإصرار وقتل عمد واضح
من الممكن أن يعاقب طبقاً للقواعد العامة في عقوبات القتل العمد مع جواز التخفيف وهو أن ينزل القاضي بالعقوبة درجة
ولكن ما أرجحه هو أن المشرع حينما تحدث عن العذر المخفف وهو من شاهد زوجته متلبسة بالزنا التلبس لا يشترط فيه أن يكون ملاحظة بصرية ومشاهدة بصرية وإنما يكفي فيه أن يدرك الشخص الجريمة بأية حاسة من حواسه بل قد تكون طريقة السرد من الزوجة في اعترافاتها أسوأ في إنشاء خيالٍ لدي المتلقي وهو الزوج أفدح وأوقع أثراً في استثارة رجولته ونزعته للإنتقام لشرفه أفدح وأقبح من المشاهدة اللحظية لإن ممكن شخص من المشاهدة اللحظية ميعرفش يتصرف من شدة الصدمة
لكن لما يستمع إلي سرد الزوجة الفاجر وهي تروي علاقتها الآثمة علي زوجها بعد مشاهدته للفيديوهات المرسلة ويستحضر نفسه كزوج مسافر ومكافح من أجل رفع مستوي معيشة أسرته فمعني العذر المخفف يتحقق له من باب أولي ويستفيد من النص ويحكم عليه سواء ببرائته او حكم مع إيقاف التنفيذ بما يعني أن التلبس بالزنا لا يقتصر فقط علي المشاهدة اللحظية لحالة الزنا وإنما جاء نص المادة 237 قاصراً يجب معالجته بإلتفات القضاة إلي امتداد نص المادة قياساً إلي كل من تتحقق علَّته فيه ونفس الواقعة المثارة حالياً حصلت في سابق الزمان في مصر وكانت هيئة الدفاع متمثلة في العلامة القدير المبدع بهاء الدين أبو شقة أطال الله عمره فقد أثار عوار نص المادة أمام هيئة المحكمة في ذلك الوقت واستطاع أن يطوع النص آنذاك ليحقق مبتغي العدالة واستقر في ضمير المحكمة هذا الدفع مما أدى إلى الحكم علي المتهم حينها ((بست شهور مع إيقاف التنفيذ)) ومع قادم الأيام ستظهر الحقيقة كاملة وبناء عليه سيكون الحكم وإنما ما تم سرده من قبلي اليوم هو تحليل للأحداث الظاهرة وليس حكم أو جزم بما سيحدث

27/06/2025

جمعتلك السليبرات اللي قالبة الدنيا واللي انت بتدور عليها❤️‍🔥🔥

تشكيلة سليبرات طبي ف اللذيذ منه بأكتر من خامة وشكل🤩

السليبر اللي بتدور عليه مش هيخرج عن واحد من دول🥵✋

جودة عالية وخامات خفيفة ومريحة وستايل روقان♥️🫡

مقاسات رجالي وحريمي من 38 ل 45✨

توصيل لأي مكان ف مصر في أسرع وقت🚛

ت/01157938643

06/05/2025

Adidas Tshirt🔥♥️

اللي معانا دايما متميز بفضل الله🥰☝️

الأسعار الفلكية اللي بتسمعها ف التيشيرتات اليومين دول مش عندنا هنلبسك ع قد الإيد وف الشياكة منه برضوا❤️‍🔥🤌

تيشيرت أديداس بوليڤار قطن 100٪ خامة ميختلفش عليها اتنين🤩

حتة أوڤر سايز مقاسات من L ل 2XL📥

متوفرة دلوقتي ب تلت ألوان ( اسود ـ أوف وايت ـ بترولي )

توصيل لأي مكان ف مصر ف أسرع وقت بفضل الله🚛

ت/01157938643-01024969081

أ/ مؤنس محمد مؤنس - المحامِ

23/09/2026

15/09/2026

03/09/2026

30/08/2026

25/08/2026

23/08/2026

19/08/2026

17/08/2026

27/06/2025

06/05/2025

Address

Telephone

Website

Alerts

Contact The Practice

Shortcuts

Share

Listing takedown request